Ռուսաստանի նախագահ Վլադիմիր Պուտինը հայտարարել է, որ իր ամերիկացի գործընկեր Բարաք Օբամայի հետ բանակցությունները շատ անկեղծ էին եւ ցույց տվեցին, որ կողմերը համատեղ կարող են աշխատել ընդհանուր խնդիրների շուրջ: Նա այդ հանդիպումը շատ օգտակար է որակել, ինչպես նաեւ կառուցողական եւ աշխատանքային: Պուտինի հայտարարությունը փոխանցել է «TASS»-ը:
«Ինձ թվում է, որ գործընկերները նույնպես շատ պարզ ներկայացրեցին բազմաթիվ հարցերով իրենց դիրքորոշումը, այդ թվում՝ Ուկրաինայի իրավիճակի կարգավորումը եւ Սիրիայի ու Մերձավոր Արեւելքի խնդիրները: Մենք զարմանալիորեն շատ ընդհանուր կարծիքներ եւ մտքեր ունենք: Բայց կան նաեւ տարաձայնություններ: Սակայն իմ կարծիքով կա ընդհանուր խնդիրների շուրջ համատեղ աշխատելու հնարավորություն»,- նշել է Պուտինը:
Պուտինը չի համաձայնել այն պնդման հետ, թե նա երկար ժամանակ Օբամայի հետ չի շփվել. «Դա այդպես չէ: Մենք նրա հետ խոսել ենք հեռախոսով, միջազգային հարթակներում էլ ենք շփվել, կարճ հանդիպումներ ենք ունեցել, սակայն, համենայն դեպս, քննարկել ենք կարեւոր հարցեր ե՛ւ երկկողմ հարաբերությունների ե՛ւ միջազգային օրակարգի հետ կապված»:
Նրա խոսքերով՝ եթե «տեսախցիկներով» այսօրվա նման հանդիպումներ չեն եղել, դա չի նշանակում, որ կապերը ընդհանրապես չեն եղել. «Կապը ընդհանրապես չի կտրվել, այդ առնչությամբ չի կարող որեւէ անհանգստություն լինել, եւ շահարկումներ պետք չեն»:
Կարդացեք նաև
Պուտինը ընդունել է, որ Ռուսաստանի եւ ԱՄՆ-ի միջեւ հարաբերություններն այժմ ցածր մակարդակի վրա են, սակայն ոչ Մոսկվայի մեղքով: Դա ԱՄՆ-ի մեղքն է. «Մենք միշտ պատրաստ ենք զարգացնել հարաբերությունները եւ ամբողջությամբ վերականգնել դրանք»:
Պատրաստեց Աշոտ ԻՍՐԱԵԼՅԱՆԸ
