«Մեծամոր» պատմահնագիտական արգելոց-թանգարանի «ոսկե ֆոնդը» նորացվել է. փոխվել են զետեղարանները, որպեսզի ցուցադրվող նյութերն ավելի տպավորիչ երեւան: Այս մասին Aravot.am-ին հայտնեց «Պահպանության ծառայություն» ՊՈԱԿ-ի գիտական աշխատանքների գծով փոխտնօրեն, հնագետ Աշոտ Փիլիպոսյանը: «Մեծամորի հնավայրից պեղված ոսկյա իրերը եզակի են տարածաշրջանի համար: Կարծում եմ՝ ոսկե ֆոնդը տեսած ցանկացած այցելու տպավորված է հեռանում»,-ասաց նա:
Ոսկյա գտածոներից հետաքրքրական է ծամկալը՝ հայտնաբերված «կուր-արաքսյան» դամբարանից. «Այն ամենահինն է Հայաստանում՝ մ.թ.ա. 4-րդ հազարամյակի վերջ- 3-րդ հազարամյակի սկիզբ: Այդ փուլում արդեն մեր նախնիները ոսկուց առարկաներ պատրաստելու հմտություն են ունեցել»,-ասաց Փիլիպոսյանը: Ինչ վերաբերում է առյուծի տեսքով նմուշներին, ապա դրանք արծաթե գոտու մասեր են:
Հավելենք, որ ցուցադրությունը բաց է բոլոր ցանկացողների առջեւ: Ավելի վաղ հայտնել էինք, որ օրերս բացվել է թանգարանի համալրված ցուցադրությունը, https://www.aravot.am/2015/10/03/615212/ որը ներառում է վերջին 50 տարում Մեծամորի հնավայրում պեղված լավագույն գտածոները:
Կարդացեք նաև
Լուիզա ՍՈՒՔԻԱՍՅԱՆ
