«Մենք դեռ շատ բարեխիղճ ենք, երբ տալիս ենք այդ 1 շաբաթ ժամանակը»,- նոյեմբերի 23-ին «Կարմիր քարտի» բողոքի ակցիայից հետո լրագրողների հետ զրույցում ասաց նախաձեռնության անդամ Փայլակ Թեւանյանը:
Հիշեցնենք՝ բողոքի ակցիայի ընթացքում «Կարմիր քարտ» նախաձեռնությունը նամակներ փոխանցեց ՀՀ կառավարությանը, Ազգային ժողովին եւ նախագահական նստավայր: Նախաձեռնությունը պահանջում է նվազեցնել էլեկտրաէներգիայի, շաքարավազի, գազի, ալյուրի եւ բենզինի սակագները:
Փայլակ Թեւանյանը նշեց, որ նախաձեռնությունը կարող էր պետական կառույցներին ընդհանրապես ժամանակ չտալ, ուղղակի քաղաքացիները դուրս գային փողոց եւ ասեին՝ վերջ, պետք է նվազի. «Բայց մենք բարեխիղճ գտնվեցինք եւ իրենց տալիս ենք 1 շաբաթ ժամանակ: Կառավարությունը իրավունք չունի, ասում է՝ 1 ամիս տվեք մեզ, ոչ թե մեկ շաբաթ: Ի՞նչ 1 ամսի մասին է խոսքը: Երբ որ, ասենք, ազգը թալանվում է արդեն մի քանի տասնյակ տարի, էլ ի՞նչ ժամանակի մասին է խոսքը: Այսքան ժամանակ լռում են, հենց ինչ-որ մեկը գալիս ասում է՝ գիտեք՝ ինչ, ինձ թալանում են, այդ ժամանակ իրենք պետք է սկսեն աշխատել, հա՞: Իրենց գրասենյակներում ինչի՞ համար են նստում, իրենց ինչի՞ համար ենք աշխատավարձ տալիս, որ իրենք գնան իրենց աշխատասենյակներում նստեն, դուրս գան, ասեն՝ չէ՛, գիտեք՝ ինչ, 1 ամիս ժամանակ: Չկա 1 ամիս ժամանակ, մենք իրենց 1 շաբաթ ժամանակ ենք տալիս»:
Կարդացեք նաև
Հարցին, եթե այդ մեկ շաբաթվա ընթացքում պետական կառույցները չտեղավորվեն, ի՞նչ է անելու նախաձեռնությունը, նա պատասխանեց. «Դա արդեն իրենց խնդիրն է: Մենք սկսելու ենք իրականացնել քաղաքացիական անհնազանդություններ, սկսելու ենք փողոցներ փակելուց, մնացածը իրենց համար անակնկալ է»:
Ամի ՉԻՉԱԿՅԱՆ
