Կառավարության ծրագրում շատ կարեւոր դրույթ կա գործարարության մասին. «Ինստիտուցիոնալ բարեփոխումների, կայուն եւ կանխատեսելի օրենսդրական դաշտի միջոցով հասնել առավել նպաստավոր գործարար միջավայրի ձեւավորմանը»։ Գաղտնիք չէ, որ բիզնեսը չի սիրում հարկային մշտական փոփոխություններ, իսկ Հայաստանում տարին մի քանի անգամ փոխվում է հարկային օրենսդրությունը։ Պարզվում է, որ այսքանը մեր կառավարությունը չգիտի։
Ֆինանսների փոխնախարար Վախթանգ Միրումյանը պատգամավորի հարցին պատասխանում է, թե «ԱՄՆ Միջազգային զարգացման գործակալությունը հետազոտություն է արել եւ պարզել, որ հարկային ընկալման տեսակետից հաճախակի փոփոխությունները բացասաբար են անդրադառնում»։ Հետաքրքիր է՝ այսքանը մեր կառավարությունը չգիտե՞ր, եւ անհրաժեշտ էր ամերիկյան հետազոտությո՞ւն։ Ասում են՝ մարդիկ բողոքում են մշտական փոփոխություններից, փոխնախարարը պատասխանում է. «Դրա համար էլ որոշել ենք փոխել հարկային օրենսդրությունը»։ Այսինքն՝ կրկին փոփոխելու են, այս անգամ՝ ամբողջությամբ։
Եվս մեկ ուշագրավ դրույթ. «Վարկանիշային գնահատումներ իրականացնող միջազգային հեղինակային կազմակերպություններում Հայաստանի Հանրապետության դիրքի բարելավման նպատակով համապատասխան միջոցների ձեռնարկում»։
Կառավարության հիմնական նպատակներից մեկն է վարկանիշային աղյուսակներում լավ տեղեր զբաղեցնելը՝ անկախ իրականությունից։ Օրինակ, Հայաստանում բիզնես հիմնելն աշխարհում ամենահեշտերից մեկն է՝ 5-րդը, բայց գործունեություն ծավալելը՝ հավանաբար, վերջին տասնյակում։ ԱՄՆ պետդեպը, Bloomberg միջազգային գործակալությունը, միջազգային ֆինանսական կորպորացիան, համաշխարհային մրցունակության ինդեքսը եւ միջազգային այլ հեղինակավոր ու ոչ հեղինակավոր կազմակերպություններ մշտապես վարկանիշային ցանկեր են հրապարակում։ Երբ դրական է, կառավարությունը մշտապես հղումներ է անում, երբ բացասական է, ասում են, թե հետին կազմակերպություն է։ Այնպես որ, կառավարությունը միայն հետաքրքրված է թվանկարչությամբ, իսկ իրականությունը, կարծես, անկարեւոր է։
Կարդացեք նաև
Երբ դու չունես առաջխաղացում, բայց միջազգային վարկանիշային աղյուսակներում «չալաղաջ» տեղ ես զբաղեցրել, ուրեմն կասկածելի են քո ծրագրով նշած՝ միջազգային հեղինակավոր կառույցների հետ աշխատանքը։
Սեւակ ՀԱԿՈԲՅԱՆ
Հոդվածն ամբողջությամբ կարող եք կարդալ «Հրապարակ» թերթի այսօրվա համարում
