Դեկտեմբերի 8-ին ԱԺ առողջապահության, մայրության եւ մանկության հարցերի մշտական հանձնաժողովն Արա Բաբլոյանի նախագահությամբ կայացած նիստում քննարկել է ՀՀ կառավարության հեղինակած «Դեղերի մասին» եւ կից օրենքների նախագծերի փաթեթը, որը ներկայացրել է ՀՀ առողջապահության փոխնախարար Սերգեյ Խաչատրյանը:
Զեկուցողը նշել է, որ նախագծով սահմանվում են դեղային պետական քաղաքականության հիմնական սկզբունքները? որպես նպատակ որդեգրելով դեղերի ֆիզիկական եւ ֆինանսական մատչելիության ոլորտում արդարության ապահովությունը, առաջին անգամ սահմանվում է դեղերի գների՝ պետական կարգավորում իրականացնելու հնարավորությունը:
Սերգեյ Խաչատրյանը տեղեկացրել է, որ օրենսդրորեն կարգավորվում են դեղերի շրջանառության բոլոր փուլերը. դեղի ստեղծումից մինչեւ գովազդ եւ իրացում:
Սահմանվում են նաեւ դեղերի գրանցման համար նախակլինիկական եւ կլինիկական փորձարկումներին ներկայացվող պահանջները, արգելքները եւ կլինիկական փորձարկումների թույլտվության տրամադրման, մերժման, դադարեցման ընթացակարգերը, սահմանվում են դեղերի պետական գրանցման հիմնական սկզբունքները, մեխանիզմները, պետական գրանցմանը ներկայացվող նորացված պահանջները:
Կարդացեք նաև
Առողջապահության փոխնախարարի տեղեկացմամբ? օրենքով սահմանվում են դեղերի ներմուծմանը եւ արտահանմանը, ներմուծման եւ արտահանման հավաստագրեր տրամադրելուն ներկայացվող պահանջները, ներմուծելու ընդհանուր կանոնները, կարգավորվում են դեղատնային գործունությանն առնչվող պահանջները, սահմանվում են դեղերի գրանցումները:
Հանձնաժողովի նախագահ Արա Բաբլոյանը տեղեկացրել է, որ դեղերի ոլորտն ուսումնասիրելու նպատակով արդեն մի քանի ամիս է, ձեւավորվել է աշխատանքային խումբ, որի աշխատանքներին մասնակցել են պատգամավորներ, ՀՀ առողջապահության նախարարության մասնագետներ, դեղ ներկրող եւ արտադրող ընկերությունների ներկայացուցիչներ: Բազմաթիվ առաջարկներ, ըստ նրա, ձեւավորվել են հենց այդ աշխատանքային խմբի կատարած ուսումնասիրությունների արդյունքում:
Հանձնաժողովի անդամները ներկայացրել են փաթեթի վերաբերյալ իրենց առաջարկները, որոնք կքննարկվեն մինչ երկրորդ ընթերցում:
Նախագծերի փաթեթն ստացել է դրական եզրակացություն եւ ընդգրկվել դեկտեմբերի 7-10-ի քառօրյա նիստերի օրակարգի նախագծում:
ՀՀ ԱԺ
