«2015թ. Հայաստանի ազգային պատկերասրահ է այցելել 84 հազարից ավելի մարդ»,-այսօր Հայաստանի ազգային պատկերասրահում լրագրողներին հայտնեց պատկերասրահի գիտքարտուղար Արմինե Գաբրիելյանը:
Ամփոփելով տարին՝ նա ներկայացրեց կազմակերպված միջոցառումները. «Ունեցանք 20-ից ավելի ցուցահանդեսներ: Մասնավորապես, Կոմիտասի 145-ամյակին նվիրված ցուցահանդեսում ներկայացվեցին ժամանակակից ստեղծագործողների աշխատանքներ, որոնք նվիրաբերվեցին Կոմիտասի թանգարան-ինստիտուտին: Գրիգոր Աղասյանին նվիրված ցուցահանդեսի միջոցով այցելուները ճանաչեցին հին Երեւանի քնարերգուին, ով անդրադարձել է նաեւ ցեղասպանությանը: «Ոչ ցեղասպանությանը» խորագրով մանկական ցուցահանդեսն էլ նվիրված էր ցեղասպանության ժամանակ սպանված երեխաներին: Սեդրակ Առաքելյանի ծննդյան 130-ամյակին նվիրված ցուցահանդեսում էլ առաջին անգամ ցուցադրվեցին նրա մեծ թվով աշխատանքներ, տպագրվեց պատկերագիրք»:
Պատկերասրահի տնօրեն Արման Ծատուրյանը հայտնեց, որ առաջիկայում ընդլայնվելու է կոլեկցիոներների հետ գործակցությունը՝ նախկինում չցուցադրված աշխատանքները այցելուներին ներկայացնելու համար:
Հիշեցնենք, որ Եղիշե Թադեւոսյանի 145-ամյակին նվիրված ցուցահանդեսը ներառում էր Վահագն Գրիգորյանի անհատական հավաքածուն, որի շնորհիվ շատ արխիվային նյութեր բերվեցին Հայաստան ու ցուցադրվեցին առաջին անգամ՝ Ազգային պատկերասրահում:
Կարդացեք նաև
«Մենք նաեւ նոր էջ ենք բացում՝ ներկայացնելով սփյուռքահայ արվեստագետներին, որոնց մասին շատ քիչ բան գիտենք: Պատրաստելու ենք սփյուռքահայ նկարիչների ցուցահանդեսների շարք»,- տեղեկացրեց Արման Ծատուրյանը:
Նա անդրադարձավ նաեւ պատկերասրահից թանգարանային նմուշների գողության դեպքերին՝ ասելով, որ դրանք բացառելու նպատակով առաջիկայում հաստատության ֆոնդերում եւ միջանցքներում կտեղադրվեն 120 տեսախցիկներ:
Ծատուրյանի փոխանցմամբ՝ ներկայումս էլ ընթացքի մեջ են մի քանի քրեական գործեր:
Հիշեցնենք, որ 2009 թվականի մարտի 30-ի լույս 31-ի գիշերը պատկերասրահի Հրազդանի մասնաճյուղից գողացել են 19 ստեղծագործություններ, այդ թվում՝ Այվազովսկու «Նավաբեկությունը»: «Պետությունը փորձում է վերադարձնել այդ կտավը: Ժառանգներն ասել են, որ եթե գտնվի, կվերադարձվի Ազգային պատկերասրահին»,- ասաց պարոն Ծատուրյանը:
Հավելենք, որ արդեն չորս քանդակ է վերադարձվել Ազգային պատկերասրահին. գնորդները չեն իմացել, որ դրանք թանգարանային առարկաներ են: Դրանք առգրավվել են եւ ի պահ հանձնվել պատկերասրահին:
Ի դեպ, այս տարի մշակութային հաստատությունում նախատեսվում է ստեղծել մասնավոր հավաքածուների բաժին:
Լուիզա ՍՈՒՔԻԱՍՅԱՆ
հարգեք և հնարավորություն տվեք նաև Հայասատանի նկարիչներին https://urbattert.am/%D0%B5%D1%81%D0%BB%D0%B8-%D0%B1%D1%8B-%D0%B3%D1%83%D0%BB%D0%BB%D0%B8%D0%B2%D0%B5%D1%80-%D0%B1%D1%8B%D0%BB-%D0%B0%D1%80%D0%BC%D1%8F%D0%BD%D0%B8%D0%BD%D0%BE%D0%BC/