«Քվեարկության օրվա մեր դիտարկման արդյունքները ցույց տվեցին, որ, ինչպես եւ ենթադրվում էր, հանրաքվեն ուղեկցվեց բազմաթիվ խախտումներով, որոնք շատ ավելի կոպիտ էին, քան նախատեսվում էր: Նույնիսկ մոռացված խախտումներ, բռնություններ ի հայտ եկան»,- այս մասին այսօր «Մեդիա կենտրոն»-ում հայտարարեց «Թրանսփարենսի Ինթերնեշնլ» հակակոռուպցիոն կենտրոնի փոխտնօրեն Սոնա Այվազյանը:
Նա ներկայացնում էր «Քաղաքացի դիտորդ» նախաձեռնության ամփոփիչ զեկույցը սահմանադրական հանրաքվեի արդյունքների մասին:
Սոնա Այվազյանը հանրաքվեի ընթացքում տեղ գտած խախտումներից առանձնացրեց լցոնումների, բռնությունների, վարչական ռեսուրսի չարաշահման դեպքերը. «Այս հանրաքվեն չի կարելի որեւէ կերպ համարել կայացած եւ լեգիտիմ: Դրանք որեւէ կերպ չեն համապատասխանում Վենետիկի հանձնաժողովի լավ պրակտիկայի ուղեցույցի որեւէ կետի»:
Զեկույցի պատրաստմանը, բացի «Քաղաքացի դիտորդ»-ից, մասնակցել է նաեւ Ժողովրդավարական ընտրությունների եվրոպական պլատֆորմը. «Մեր արտաքին գործերի նախարարության բյուրոկրատական կամ միտումնավոր քաշքշուկների պատճառով՝ նրանց հնարավորություն չէր տրվել ստանալ միջազգային դիտորդի կարգավիճակ, եւ նրանք ստիպված հանդես են եկել «Քաղաքացի դիտորդի» հետ համատեղ: Նրանց զեկույցները եւս ներառված են»:
Կարդացեք նաև
Պլատֆորմի վիճակագրական վերլուծությունն, ըստ Սոնա Այվազյանի, ցույց է տալիս, որ քվեարկության արդյունքներն ամբողջովին տարբեր կլինեին, եթե չլինեին լցոնումները, խախտումները եւ բռնությունները. «Այդ դեպքում Երեւանում «Այո»-ն մոտ 20%-ով քիչ կլիներ: Իսկ Հայաստանի ամբողջ տարածքում, հավանաբար, 30-40% «Այո» կլիներ եւ 70% «Ոչ» կլիներ»:
Աշոտ ԻՍՐԱԵԼՅԱՆ
Լուսանկարը՝ «Մեդիա» կենտրոնի
