Ստամբուլի «Ժամանակ» թերթի գլխավոր խմբագիր Արա Գոչունյանը մեկնաբանելով ԵԽԽՎ-ում ստեղծված իրավիճակը, նշեց, որ դրանից առաջին հերթին պետք է դասեր քաղել՝ մասնավորապես միջազգային հարթակներում գործունեության կազմակերպման տեսակետից։ «Այս օրինակը վառ է նախ եւ առաջ այն իմաստով, որ Մարգար Եսայանը Թուրքիայի Ազգային մեծ ժողովի անդամ է, իսկ Նաիրա Զոհրաբյանը՝ Հայաստանի Ազգային ժողովի, այսինքն երկրներ, որոնք ունեն հակադիր շահեր։ Եվ մեր աչքի առջեւ իրականությունն այն է, որ ցանկացած երկրի պատգամավոր միջազգային բեմահարթակում պաշտպանում է իր երկրի շահերը։ Սա շատ ուսանելի օրինակ է նաեւ Հայաստանի սփյուռքի վրա դրված հույսերի տեսանկյունից։
Պետք է հասկանալ, որ մարդիկ, ովքեր այդ դիրքի վրա են գտնվում, պատասխանատվություն ունեն իրենց երկրի շահը պաշտպանելու։ Եվ այս պարագայում Մարգար Եսայանը կողմ է քվեարկել այն բանի համար, որը համընկել է Թուրքիայի շահերին»,- ասաց Գոչունյանը։
Ասել է թե, պետք չէ դրամատիզացնել ինչպես հայտնի բանաձեւին կողմ քվեարկելու՝ Մարգար Եսայանի քայլը, այնպես էլ Եսայանի եւ Զոհրաբյանի միջեւ տեղի ունեցածն ու դրա հնարավոր հետեւանքները։
Ի դեպ, Գոչունյանի փոխանցմամբ, Թուրքիայում հայ համայնքի կողմից նույնպես Եսայանի քվեարկությունն ու առհասարակ ԵԽԽՎ-ում երկու հակահայ բանաձեւերի շրջանառությունը մեծ արձագանք չեն գտել։ Սրա պատճառն, ըստ Գոչունյանի, այն է, որ Թուրքիայի հայ համայնքը սովոր է միջազգային բեմահարթակներում, խորհրդարաններում տարբեր բանաձեւեր ընդունելու աշխատանքներին եւ «Թուրքիայի հայ հասարակական կարծիքը լավ գիտի, որ դրանք գործնականում ոչ մի բան փոխել ի զորու չեն»։
Կարդացեք նաև
Աննա ՀԱԿՈԲՅԱՆ
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում