«ՀՀԿ-ՀՅԴ համագործակցության մասին հուշագիրը կկնքվի հաջորդ շաբաթվա սկզբին»,- խորհրդարանում լրագրողների հետ զրույցում այսօր ասաց ՀՅԴ խմբակցության պատգամավոր Արծվիկ Մինասյանը: Այդ համագործակցության շրջանակներում, ինչպես արդեն հայտնի է, Արծվիկ Մինասյանին բաժին կհասնի ՀՀ էկոնոմիկայի նախարարի պաշտոնը:
Լրագրողները հետաքրքրվեցին` հե՞շտ է հեռանալու խորհրդարանից, Արծվիկ Մինասյանն ասաց, որ իր պատկերացումներով, Ազգային ժողովն ու կառավարությունը միասնական օրգանիզմ պետք է լինեն երկրում ծառացած խնդիրների հաղթահարման համար. «Ես ինձ կզգամ երկրի պետական կառավարման մի մասը, և եթե Աստծո կամոք լինի պաշտոնի հրաման՝ ուրեմն սերտ համագործակցությունը խորհրդարանի հետ կլինի»:
ՀՅԴ-ՀՀԿ ստորագրվելիք հուշագրի կետերն ապագա նախարարը հրաժարվեց բացահայտել. «Սպասենք մի քանի օր, կհրապարակվի և յուրաքանչյուր կետի վերաբերյալ կարող ենք մանրամասն քննարկել»: Նա վստահեցրեց, որ համաձայնագրի կետերի շուրջ տարաձայնություն չկա:
ՀՅԴ-ում դեռեւս որոշում չկա, թե ո՞վ կզբաղեցնի Արծվիկ Մինասյանի պատգամավորական աթոռը:
Կարդացեք նաև
Նելլի ԳՐԻԳՈՐՅԱՆ
