ԱԺ-ում հայտարարվեց Գասպարիի նկատմամբ խոշտանգումների, ոչ մարդկային վերաբերմունքի մասին: Քանի որ դուք արդեն պատասխանատվություն եք կրում ներկա վիճակի համար, չե՞ք հետաքրքրվել՝ արդյոք խախտվե՞լ են նրա իրավունքները բանտում, գնացե՞լ եք կալանավայր: ՀՅԴ խմբակցության ղեկավար Արմեն Ռուստամյանը մեր այս հարցին այսօր ԱԺ ճեպազրույցների ժամանակ պատասխանեց, որ կալանավայր չի գնացել. «Մենք ստորագրահավաքին միացել ենք, ինչպես գիտեք, նաեւ հետեւում ենք, որ այն, ինչ ԱԺ-ում հայտարարվեց, համապատասխան մարմինները դրանով զբաղվեն: Հիմա պարտադիր չի, որ անձամբ մենք զբաղվենք, հետեւում ենք, որ այդ գործընթացը պատշաճ իրականացվի: Թացը չորից պետք է կարողանանք հասկանալ, որ մենք մեր մասնակցությունը բերենք»:
Արմեն Ռուստամյանը պատմել էր, թե 90-ականներին ինչ խոշտանգումների են իրենք ենթարկվել բանտերում: Դիտարկմանը՝ Գասպարիի պատմածից պարզ է դառնում, որ այս տարիներին որեւէ բան չի փոխվում ՀՀ-ում՝ Արմեն Ռուստամյանը չհամաձայնեց. «Շատ բան է փոխվել, ես ինքս գիտեմ այդ տարբերությունը, թե ինչպիսին էր 20-30 տարի առաջ»:
Ըստ Ռուստամյանի, քաղաքական գործիչները կարող է իրենց շահերից ելնելով հայտարարություններ անեն, որ քաղբանտարկյալ է Գասպարին, կտտանքների է ենթարկվում, բայց կա մասնագիտական մարմին, որը պետք է հրապարակի. «Խցում ծեծվելը բոլորովին այլ դրդապատճառներով կարող է տեղի ունենալ: Եթե դա տեղի է ունեցել հարցաքննության ժամանակ, եթե տեղի է ունեցել իրենից ինչ-որ ցուցմունք կորզելու նպատակով՝ դրանք բոլորը տարբեր էպիզոդներ են, տարբեր խնդիրներ են: Իսկ եթե խցում ինչ-որ վեճ է եղել, որը շատ հավանական է, մոտ երեք տարի ես խցում եմ եղել՝ էնքան ծեծ ու ջարդ է եղել, բայց ես չեմ համարում, որ դա եղել է անպայման ինչ-որ կազմակերպված: Գողական աշխարհ է, հազար ու մի բան կարա լինի: Մի հատ պիտի տարբերենք՝ ինչ է եղել, որից հետո կարողանանք եզրակացնել»:
Կարդացեք նաև
Հռիփսիմե ՋԵԲԵՋՅԱՆ
