Ամփոփելով Հայաստանում ընտրությունների 28 տարվա փորձը՝ «Ղարաբաղ» կոմիտեի անդամ Աշոտ Մանուչարյանն այսօր «Փաստարկ» մամուլի ակումբում կարծիք հայտնեց, որ ընտրությունները երկրի արտաքին կառավարման գործիք են: Նա կարծում է, որ շատ հեշտ կարելի է կանխել ընտրակեղծիքները`առաջին իսկ ընտրության եւ կեղծիքների դեպքում դրանք չճանաչելով: Այս համատեքստում, Աշոտ Մանուչարյանը կարծում է, որ Բելառուսի նախագահը Արեւմուտքի կողմից հայտարարվեց առաջին դիկտատոր, քանի որ նա միակն էր հետխորհրդային երկրների ղեկավարներից, որը չէր կատարում իրենց հանձնարարությունները:
Աշոտ Մանուչարյանը հիշեցնում է, որ 2008 թվականի մարտի 1-ից հետո նույն եվրոպացիները հայտարարեցին, թե Հայաստանում այլեւս հնարավոր չեն ընտրությունները, քանի դեռ բացահայտված չեն մարտիմեկյան սպանությունները: Ու ընդամենը մեկ տարի հետո նույն եվրոպացիները մարտի 1-ի էջը շրջված համարեցին, քանի որ կային հայ-թուրքական հաշտեցման մասին հանձնարարականներ, որոնք Հայաստանի իշխանությունները համաձայնել էին կատարել:
Նա անհեթեթ է համարում թեզը, որ 1990-ականներին արտադրված էլեկտրաէներգիան հողանցվում էր, որ մարդկանց չտրվեր: Հիշեցնում է, որ Անվտանգության խորհրդի որոշմամբ, որքան էլեկտրաէներգիա արտադրվում էր, տրվում էր արդյունաբերությանը, որպեսզի մասնագետներին չկորցնենք, երկիրը չկորցնենք: Բայց արտաքին կառավարման արդյունքում, այսօր Հայաստանում բոլորը խոսում են միայն տուրիզմի, սպասարկման, մասամբ էլ տեղեկատվական ոլորտի զարգացման մասին:
Աշոտ Մանուչարյանը հույս ունի, որ մինչեւ 2017 թվականի հերթական ընտրությունները, հայ հասարակությունը, ժողովուրդը կհասկանա այս ամենը եւ կգնա ոչ թե իրեն թելադրված կեղծ օրակարգով, այլ իր ճանապարհով: Նա չի կարծում, որ արդար ընտրությունը կփրկի Հայաստանը, քանի որ դրանց արդյունքում իշխանության եկածները շատ արագ փչանում են:
Կարդացեք նաև
Այլ մանրամասները` տեսանյութում
Նելլի ԳՐԻԳՈՐՅԱՆ
