«Եթե կարողանանք թափանցիկ դարձնել, էապես լուծված կլինի հասարակության վստահությունը»,- մարտի 24-ին «Փաստարկ» մամուլի ակումբում լրագրողների հետ հանդիպման ընթացքում ասաց ԱԺ պատգամավոր Խոսրով Հարությունյանը:
Ըստ նրա, վստահության ապահովման համար մեկ երաշխիքը՝ բացառել կամ հնարավորինս նվազեցնել կրկնաքվեարկությունը, որը բոլորն են պնդում՝ տարաձայնություն չկա: Սակայն տարաձայնություններ կան առաջարկվող մեխանիզմների մեջ: Օրինակ՝ ընդդիմությունը պահանջում է մատերը թանաքոտել եւ արդյունքների ամփոփումից հետո հրապարակայնացնել ընտրության մասնակցության ցուցակները:
«Առաջին հայացքից թվում է՝ շատ պարզ, հասկանալի, ոչ վիճահարույց պնդումներ, ընդ որում` հղում են կատարում նաեւ միջազգային փորձի վրա: Մենք էլ, երբ փորձում ենք այս հարցադրումները մեկնաբանել, նույնպես հղում ենք կատարում միջազգային փորձի վրա: Այսինքն՝ մենք չենք մերժում, որ հարկավոր է ամեն ինչ անել, որպեսզի որեւիցե մեկը մեկ ուրիշի փոխարեն չքվեարկի, եւ երկրորդ անգամ ինքը չհայտնվի ընտրական տեղամասում, մենք սա չենք մերժում: Մենք ասում ենք՝ արդյոք մատները թանաքոտելը իսպառ բացառո՞ւմ է այս հնարավորությունը: Կա տեսանելի թանաք եւ անտեսանելի թանաք: Տեսանելի թանաքի պարագայում որեւէ մեկը ինձ չի կարող համոզել, որ ես չեմ մտնի քվեարկի, դուրս գալուց հետո մաքրեմ, նորից գամ քվեարկության, ու շատ դժվար կլինի ինձ վերահսկել: Սա շատ պարզ է, ենթադրել, որ դա բացառել է պետք, թույլ տվեք չհամաձայնել: Շատ-շատերը նույնիսկ դեմ կլինեն, որ իրենց մատները թանաքոտեն: Արեւելյան Եվրոպայի երկրները, որոնք գնացել են այս ճանապարհով հայտնվեցին այս խնդրի առաջ:
Անտեսանելի թանաք. նշանակում է՝ կա մի լուծույթ, որով քսում ես մատին, եւ այնուհետեւ հատուկ ուլտրամանուշակագույն ճառագայթներով տեսանելի ես դարձնում այդ լուծույթի արտացոլումը: Դրա համար համապատասխան հանձնաժողովի համապատասխան անդամը պետք է զինվի համապատասխան լապտերով եւ ուղղակի սքան անի: Բայց ինչ ցույց տվեց Վրաստանի փորձը, ինչ ցույց տվեց Արեւելյան Եվրոպայի երկրների փորձը, որոնք արել են սա: Նախ շատ դժվար է պարզել, թե հանձնաժողովի անդամը սեղմում է կոճակը, եւ երկրորդը՝ վերջին հաշվով, ինչպես ցույց է տալիս փորձը, կարող է քսվել բռնակին, դուք մտնում եք տեղամաս եւ ձեր մատներից մեկի վրա հայտնվում է նիտրին, եւ դուք համարվում եք քվեարկած»,- ասաց նա:
Կարդացեք նաև
Խոսրով Հարությունյանը, անդրադառնալով ցուցակների հրապարակայնացմանը, ասաց, որ դա կարելի կլիներ անել այն դեպքում, երբ չլիներ համակարգ, որը էապես նվազեցնում է կրկնաքվեարկության հնարավորությունը: Նա համոզմունք հայտնեց, որ այն քաղաքացիները, որոնք չեն մասնակցել քվեարկությանը, պարզապես հետաքրքրություն չեն ցուցաբերել, հետեւաբար՝ կասկածի տակ է դնում, որ բոլորը կգնան ընտրատեղամասեր՝ տեսնելու՝ արդյոք իրենց փոխարեն ինչ-որ մեկը քվեարկե՞լ է, թե՞ ոչ:
«Հրապարակել ցուցակ, նշանակում է հրապարակել անձնական տվյալներ, օրինակ՝ անձնագրի համար, օրինակ՝ ստորագրություն: Ես չեմ ցանկանա, որ իմ անձնագրի համարը եւ ստորագրությունը այսօրվա տեխնոլոգիական հանցագործությունների ժամանակաշրջանում ժամերով կախված լինի: Կարծում եմ՝ շատ-շատերը կլինեն այդպես մտածող»,- ասաց Խոսրով Հարությունյանը:
Ամի ՉԻՉԱԿՅԱՆ
