Արաբկիր եւ Քանաքեռ-Զեյթուն վարչական շրջանի ընդհանուր իրավասության դատարանում այսօր քննվում էր քաղաքացիական ակտիվիստ Գեւորգ Սաֆարյանի կալանքի երկարացման հարցը:
Դռնփակ նիստից հետո փաստաբանն ասաց, որ դատավորին ինքնաբացարկ է ներկայացրել, նրա՝ կողմնակալ վերաբերմունքի համար:
Պարոն Հայրապետյանի խոսքով, նախորդ անգամ էլ էր դատավոր Դավիթ Գրիգորյանը որոշել երկարացրել Գեւորգ Սաֆարյանի կալանքը.
«Նախորդ անգամ էլ մենք բազմաթիվ հակափաստարկներ էինք ներկայացրել, բայց դատավորը մնաց անդրդվելի եւ նման անհիմն որոշում կայացրեց»:
Կարդացեք նաև
Դատարանը փաստաբանի միջնորդության վերաբերյալ որոշում կայացնելու համար խորհրդակցական սենյակ է հեռացել:
Իսկ դատարանի դիմաց ի պաշտպանություն ակտիվիստի «Նոր Հայաստան» փրկության ճակատի մի քանի ներկայացուցիչ պարզել են Գեւորգ Սաֆարյանի լուսանկարով պաստառները եւ սպասում են դատարանի որոշմանը:
Հիշեցնենք, որ Գեւորգ Սաֆարյանը կալանավորվել է Երեւանի Ազատության հրապարակում Ամանորի գիշերը ընդդիմադիր «Նոր Հայաստանի» անդամների եւ ոստիկանների միջեւ բախումներից հետո:
Բախման պատճառը տոնածառի հագուստով մայրաքաղաքի փողոցներում շրջող ակտիվիստն էր: Գեւորգ Սաֆարյանի նկատմամբ մեղադրանք է առաջադրվել քրեական օրենսգրքի 316-րդ հոդվածի 1-ին մասով (իշխանության ներկայացուցչի նկատմամբ բռնություն գործադրելը):
Արփինե ՍԻՄՈՆՅԱՆ
