«Մեր օդանավակայանի այսօր գործող ուղեւորային համալիրը նախատեսված է սպասարկելու ցանկացած տիպի օդանավերի»,-պատասխանելով Aravot.am-ի հարցին՝ ասաց «Արմենիա միջազգային օդանավակայանների» մամուլի քարտուղար Գեւորգ Աբրահամյանը:
Այսօր «Sputnik Արմենիա» մամուլի կենտրոնում ԼՂՀ կառավարությանն առընթեր Քաղավիացիայի վարչության պետ, ավիատոր Դմիտրի Ադբաշյանը մտահոգություն էր հայտնել, որ «Զվարթնոց» օդանավակայանի նոր շենքը չի կարող միաժամանակ մի քանի մեծ ինքնաթիռ սպասարկել:
Ըստ պարոն Ադբաշյանի, «Զվարթնոց» օդանավակայանի կլոր շենքի մոտ կան 14 ինքնաթիռների համար կայաններ, որոնք կարող են սպասարկել անգամ կես կիլոմետրանոց օդանավեր: Ըստ ավիատորի, շենքի աշտարակն այնպես է հաշված, որ բարձրությունն ուղիղ 61 մետր է եւ մտնում է սահմանափակումների մեջ. «Այսինքն` այնպես են ընտրել այդ թիվը, որ դիսպետչերը, որը նստած է վերեւում, իր աչքով ամբողջ հորիզոնը կարող է տեսնել ու կառավարել բոլոր պրոցեսները, որոնք թռիչքի ժամանակ տեղի են ունենում օդանավի հետ»:
Մինչդեռ, ըստ Դմիտրի Ադբաշյանի, նորակառույց մասնաշենքն այդպիսի հնարավորություններ չունի: Նա համոզված է, որ «Զվարթնոցի» կլոր շենքը միջազգային պահանջներին հարմարացնելու դեպքում տասն անգամ ավելի էժան կնստի շահագործողի վրա, քան նոր մասնաշենքի կառուցումն է:
Կարդացեք նաև
Չնայած պարոն Ադբաշյանի կարծիքով կլոր շենքը թերություններ էլ ունի. չկա մաքսատուն եւ այլ հարակից կառույցներ, ինչի հետեւանքով էլ շենքը չի համապատասխանում միջազգային չափանիշներին: Բայց պարոն Ադբաշյանն ասաց, որ շենքի ամրությունը չի կարող կասկածի տակ դրվել, քանի որ այն կառուցված է այնպես, որ չվնասվի:
Հարցին, թե ինչո՞ւ են ուզում նոր շենք կառուցել, եթե կլոր շենքը տասն անգամ ավելի էժան կնստի շահագործողի վրա, եթե համապատասխանեցվի միջազգային չափանիշներին, պարոն Ադբաշյանն ասաց, որ ինքն էլ է ուզում իմանալ այդ հարցի պատասխանը:
Վերլուծելով Դուբայ-Դոնի Ռոստով ինքնաթիռի վթարի ենթարկվելու պատճառները՝ պարոն Ադբաշյանն ասաց, որ որոշ ապացույցներ վկայում են, որ խառնաշփոթ է ստեղծվել որոշ տեխնիկական պատճառներով եւ օդաչուները չեն կարողացել խառնաշփոթից գլուխ հանել եւ իրավիճակից ճիշտ դուրս գալ:
Պարոն Ադբաշյանի խոսքերով, օդաչուներին պետք է այնպես պատրաստել, որպեսզի կարողանան խուճապի չմատնվել եւ ինչ-որ կախված է իրենցից` փորձեն ցանկացած իրավիճակից դուրս գալ:
Մանրամասները՝ տեսանյութում
Նրա համոզմամբ, խորհրդային արտադրության ինքնաթիռներն ավելի հզոր եւ ապահով են, իսկ արեւմտյան արտադրությանը` տնտեսող:
Ավիատորը աբսուրդ է համարում սեփական քաղաքացիական ավիացիա եւ օդային օրենսգիրք չունենալը. «Մենք միակ երկիրն ենք, որ օդային օրենսգիրք չունենք: Ղարաբաղի պատերազմի տարիներին Հայաստանը տասնյակ ինքնաթիռներ ուներ, 60-ից ավելի օդաչուներ: Բաքվի ջարդերի ժամանակ ամեն մի օդանավը 300 մարդ էր տեղափոխում Հայաստան, այդ ո՞ր օտարերկրացի օդաչուն նման պայմաններում օդ կբարձրանար: Այդ օրերին կրակահերթի տակ հարյուրավոր թռիչքներ էին կատարվում: Ղարաբաղ զենք էին տեղափոխում, այնտեղից վիրավորների բերում: Այսօր ո՞վ է հիշում այդ օդաչուներին, մեկն Աֆրիկա է, մյուսը Ղազախստան եւ այլն: Երկիրը, որը չունի իր ավիացիան, չի կարող լինել անկախ պետություն»:
Լուսինե ԲՈՒԴԱՂՅԱՆ
