Հրայր Թովմասյանը ներողություն խնդրեց լրագրողներից. «4+4+4» ձեւաչափով երկրորդ քննարկումը բաց է ընթանում
Քիչ առաջ խորհրդարանում մեկնարկած «4+4+4» ձեւաչափով հանդիպումից առաջ ԱԺ աշխատակազմի ղեկավար, Ընտրական օրենսգրքի նախագծի հեղինակներից Հրայր Թովմասյանը ներողություն խնդրեց լրագրողներից, քանի որ նախորդ հանդիպման ժամանակ սահմանափակվել էր լրագրողների մասնակցությունը քննարկմանը: Որոշվել էր հանդիպումն առանց լրատվամիջոցների անցկացնել: Հաջորդ օրը, սակայն, «Ա1+» հեռուստաընկերության լրատվական ծրագրում հրապարակվեցին փակ հանդիպումից ձայնագրության որոշ հատվածներ: Հրայր Թովմասյանն ասաց, որ իրենք չգիտեն, թե ո՞վ է ձայնագրությունը փոխանցել մեկ լրատվամիջոցի:
Նաիրա Զոհրաբյանը եւս վրդովվեց`ասելով, որ բավական անպարկեշտ բան է տեղի ունեցել, քանի որ տղամարդավարի պայմանավորվածություն է ձեռք բերվել`փակ հանդիպում անցկացնելու մասին, եւ այն խախտվել է: Նա իրեն նույնիսկ թույլ տվեց կասկած հայտնել`ձայնագրությունը հրապարակողն ընդհանրապես «տղամարդկություն ունի՞»: «Իսկ ո՞վ ասաց, որ տղամարդ է»,- նրան հակադարձեց Լեւոն Զուրաբյանը:
Այս խոսակցությանը միջամտեց «Քաղաքացի դիտորդ» կազմակերպության ներկայացուցիչ Տիգրան Եգորյանը, ասելով, որ նիստը փակ է եղել, բոլորը տեղյակ են եղել, որ այն ձայնագրվում է, բայց ձայնագրությունը չհրապարակելու մասին պայմանավորվածություն չի եղել: Տիգրան Եգորյանը Նաիրա Զոհրաբյանին կոռեկտության կոչ արեց: Տիկին Զոհրաբյանը հակադարձեց`ասելով, որ ինքն է որոշում երբ եւ ինչպես խոսի:
Կարդացեք նաև
Վեճի մանրամասները`տեսանյութում:
ԱԺ պետաիրավական հարցերի մշտական հանձնաժողովի նախագահ Հովհաննես Սահակյանն էլ նկատեց, որ այդ քննարկման ընթացքում որեւէ պատգամավոր չի ասել այնպիսի բան, որի համար վատ զգա: Բայց կոչ արեց` հարգել պայմանավորվածությունները: Տեւական ժամանակ ընթացող բանավեճի արդյունքում որոշվեց այս քննարկումը լրատվամիջոցների համար բաց անցկացնել:
Նելլի ԳՐԻԳՈՐՅԱՆ
Հ. Գ. Ի դեպ, «Ազատության» հարցին, թե ով է տրամադրել այդ ձայնագրությունը, Տիգրան Եգորյանը պատասխանել էր․ «Ձայնագրությունը կատարվել է նաեւ իմ ձայնագրող սարքի միջոցով, որը դրված է եղել սեղանին: Եվ ձայնագրությունը ես տրամադրել եմ մի քանի լրատվամիջոցների։ Ձայնագրել եմ հրապարակելու համար»:
