Միջազգային եւ անվտանգության հարցերի հայկական ինստիտուտում ապրիլի 7-ին կազմակերպված փորձագիտական կլոր սեղանին ներկա էր նաեւ ԱԺ պատգամավոր Էդմոն Մարուքյանը:
Նա նշեց, որ ռուսական մեծ համաձայնագիրը անընդունելի է, եւ իրեն աշխարհում հայտնի չէ որեւէ երկիր, որն իր դաշնակից պետության թշնամուն վաճառում է ոչ թե պաշտպանական, այլ հարձակողական զենք. «Մեր գործընկերները նաեւ դիվանագիտական հարթակում կարծիք էին հայտնում, որ դա բիզնես է, իրենց շահերից է բխում, նրանք կզսպեն, վերահսկողության ներքո է գտնվում, եւ այլն, եւ այլն … Նման կարծիք հայտնողները եւ դիրքորոշում արտահայտողները պետք է լքեն քաղաքական եւ դիվանագիտական հարթակները»:
Էդմոն Մարուքյանի խոսքերով՝ եթե Ռուսաստանը հույս է ունեցել, որ կարող է վերահսկել, սակայն հիմա խաբված է իրեն զգում, ապա գոնե այս դեպքերից հետո, պետք է դադարեցնի Ադրբեջանի հետ պայմանագրերը՝ զենքի մատակարարումը եւ մատակարարած զենքի սպասարկումը, քանի որ Ադրբեջանը ռազմական ագրեսիայի ակտ է թույլ տվել, կատարել է ռազմական հանցագործություններ:
Պատգամավորը ընդգծեց, որ հայկական կողմը իրավական հարթակներում մեծ խնդիրներ ունի լուծելու, մասնավորապես՝ Ադրբեջանի՝ ռազմական ագրեսիայի ակտ թույլ տալու եւ ռազմական հանցագործությունների դեպքերով. «Ես կարծում եմ՝ այս երկու ուղղություններով պետք է փաթեթ կազմել, ապացույցները հավաքել, ՄԱԿ-ի անվտանգության խորհրդի միջոցով մենք պետք է դիմենք եւ խնդրենք Անվտանգության խորհրդին, որ առաջարկում ենք դիմել միջազգային քրեական դատարան Ադրբեջանի քաղաքական եւ ռազմական իշխանություններին միջազգային քրեական պատասխանատվության ենթարկելու համար:
Կարդացեք նաև
Ես միամիտ չեմ հավատալու համար, որ Անվտանգության խորհուրդը կքննարկի եւ կդիմի: Բայց եթե մենք գործը ներկայացնում ենք Անվտանգության խորհուրդ եւ պաշտոնապես պահանջում ենք դա, Անվտանգության խորհուրդը պարտավոր է դա քննարկել: Եթե Անվտանգության խորհուրդը դա քննարկի, բավականին մեծ հնչողություն, դիվանագիտական մեծ արձագանք եւ միջազգային տարբեր հարթակներում տարբեր պատժամիջոցների հիմք կարող է հանդիսանալ՝ անկախ այն հանգամանքից, թե Անվտանգության խորհուրդը ինչ կորոշի»:
Ամի ՉԻՉԱԿՅԱՆ
