ՀՀ մշակույթի նախարար Հ. Պողոսյանի պատասխանը` ս. թ. ապրիլի 21-ին, aravot.am կայքի «Մշակույթ» բաժնում հրապարակված, ՀՀ քաղաքացի Արշալույս Սարոյանի «Ինչո՞ւ չեք հանրայնացնում Ռոբեր Գեդիկյանի «Խենթ պատմությունը» վերնագրով բաց նամակին:
Հարգելի Արշալույս Սարոյան, Ռոբեր Գեդիկյանի «Մի խենթ պատմություն» խաղարկային կինոնկարը` 2015 թվականին դիտել եմ «Մոսկվա» կինոթատրոնում և ֆիլմի գեղարվեստական բարձր արժեքի վերաբերյալ Ձեր կարծիքը լիովին կիսում եմ:
Միևնույն ժամանակ տեղեկացնում ենք, որ «Մի խենթ պատմություն» կինոնկարը (սցենարի հեղինակներ՝ Ռոբեր Գեդիկյան, Ժիլլ Թուրան, բեմադրող ռեժիսոր` Ռոբեր Գեդիկյան, տևողությունը՝ 135 րոպե) արտադրվել է 2015 թվականին «Դիաֆանա դիստրիբյուցիոն», «Ագաթ ֆիլմ», «Քանալ պլյուս» ընկերությունների և Ֆրանսիայի հեռուստատեսության կողմից: Կինոնկարի արտադրությանն աջակցել են ՀՀ մշակույթի նախարարությունը, Հայաստանի ազգային կինոկենտրոնը, Ֆրանսիայի ազգային կինոկենտրոնը։
2015 թվականին ոչ կոմերցիոն նպատակներով «Մի խենթ պատմություն» խաղարկային ֆիլմը ցուցադրվել է «Մոսկվա» կինոթատրոնում (3 սեանս), «Ոսկե ծիրան» միջազգային կինոփառատոնի բացման արարողությանը և Հ. Մալյանի անվան կինոդերասանի թատրոնում։
Կարդացեք նաև
Ֆիլմի գույքային իրավունքները պատկանում են վերոնշյալ ֆիլմարտադրող ընկերություններին: Վերջինիս նախատեսմամբ՝ ֆիլմը մասնակցելու է տարբեր միջազգային կինոփառատոների, որոնց շրջանակում չի խրախուսվում ֆիլմի նախապես հանրայնացումը: Սակայն Հայաստանի ազգային կինոկենտրոնը պայմանավորվածություն է ձեռք բերել պրոդյուսերների հետ` աշնանը ֆիլմն ընդգրկելու «Կինոաշուն» ազգային կինոյի ամիս» ծրագրում: «Կինոաշնան» շրջանակում կինոնկարը կցուցադրվի Երևանի բոլոր վարչական տարածքներում, միջնակարգ և բարձրագույն ուսումնական հաստատություններում, զորամասերում, ՀՀ մարզերում և սահմանամերձ բնակավայրերում։
Այս ծրագրի միջոցով կինոնկարն ավելի մեծ թվով հանդիսատես կունենա, քան հնարավոր էր իրականացնել ցանկացած լավագույն կինոթատրոնում։
