Ադրբեջանի Հանրապետության նախագահ Իլհամ Ալիևը պաշտոնական այցով մեկնել է Գերմանիայի մայրաքաղաք Բեռլին, որտեղ հանդիպել է այդ երկրի կանցլեր Անգելա Մերկելի հետ։ Երկու երկրների առաջնորդների միջև կայացած հանդիպումից հետո Մերկելն ու Ալիևը մամուլի ասուլիս են հրավիրել։ Թեմային անդրադարձել են նաև ռուսական լրատվամիջոցները։
Ադրբեջանի նախագահ Իլհամ Ալիևը կրկին խոսել է Լեռնային Ղարաբաղի հակամարտությունից՝ ասելով. «Հակամարտության շփման գոտու հրադադարը փխրուն է, կայուն չէ, գործող ստատուս-քվոն անընդունելի է։ Ապրիլից ի վեր հայկական կողմը շարունակում է զինված սադրանքները, որոնք ուղղված են մեր դեմ»։
Գերմանիայի կանցլեր Մերկելը նույնպես անդրադարձել է Արցախի հակամարտությանը՝ իր խոսքում ասելով. «Գերմանիան, որպես ԵԱՀԿ համանախագահող, կշարունակի համագործակցել Լեռնային Ղարաբաղի հակամարտության կարգավորման գործում և կապեր պահպանել այս խնդիրը լուծելու համար, այդ թվում՝ Ռուսաստանի հետ։ Ընդհանուր առմամբ պարզ է, նաև Ռուսաստանն է մեծ դերակատարություն ունենալու Ղարաբաղյան հակամարտության կարգավորման գործում։ Այս պահին Գերմանիան ղեկավարում է ԵԱՀԿ-ն և ցանկանում է հակամարտության խաղաղ կարգավորում»։
Գերմանիայի կանցլերի կարծիքով՝ պետք է ջանքեր գործադրել ոչ միայն հրադադարի պահպանման, այլև՝ քաղաքական գործընթացում առաջխաղացում ապահովելու համար։ Մերկելն ասել է, որ այս հարցում հաջողության հասնելու համար անհրաժեշտ է բոլոր կողմերի կամքը։
Կարդացեք նաև
Անգելա Մերկելն անդրադարձել է նաև 2016թ. հունիսի 2-ին Գերմանիայի խորհրդարանի ընդունած Հայոց ցեղասպանության ճանաչման մասին բանաձևին և Թուրքիայում դրա արձագանքներին. «Ես ջանքեր եմ գործադրելու, որպեսզի գործը հասնի Հայաստանի և Թուրքիայի միջև շփմանը։ Բունդեսթագի պատգամավորները, առանց բացառության, արդար են ընտրվել, թուրքերի արտահայտած պահանջներն ու արտահայտություններն այս թեմայով ինձ համար բացարձակ անհասկանալի են»։
