Հունիսի 6-ին Քուվեյթում ՀՀ դեսպան Ֆադեյ Չարչօղլյանը հանդիպեց Քուվեյթի Պետության Էլ-Քուվեյթ նահանգի նահանգապետ, գեներալ Սաբեթ Ալ Մուհաննայի հետ՝ իր դիվանագիտական առաքելության ավարտի կապակցությամբ:
Դեսպան Չարչօղլյանը շնորհակալություն հայտնեց նահանգապետ Սաբեթ Ալ Մուհաննային երկար տարիների սերտ համագործակցության և բազում հարցերում ցուցաբերած աջակցության համար:
Կողմերը երկուստեք գոհունակությամբ ընդգծեցին հարաբերությունների ներկայիս բարձր մակարդակը՝ այդ համատեքստում կարևորելով ապակենտրոնացված համագործակցության զարգացմանն ուղղված քայլերի շարունակականությունը և համապատասխան փոխայցելությունների կազմակերպումը: Իր հերթին նահանգապետ Ալ Մուհաննան վերահաստատեց նախկինում ձեռք բերված պայմանավորվածությունների նկատմամբ իր հանձնառությունը` վստահեցնելով, որ ամեն կերպ պատրաստ է նպաստել դրանք կյանքի կոչելուն:
Հանդիպման ավարտին Էլ-Քուվեյթի նահանգապետը հաջողություն մաղթեց դեսպանին իր հետագա գործունեության մեջ և հանձնեց պատվո հուշամեդալ` ի հիշատակ դեսպան Չարչօղլյանի առաքելության տարիների ընթացքում ստեղծված ջերմ հարաբերությունների և սերտ համագործակցության:
Կարդացեք նաև
ՀՀ ԱԳՆ
