ՌԴ նախագահի միջազգային և մշակութային համագործակցության գծով հատուկ ներկայացուցիչ Միխայիլ Շվիդկոյը համոզված է, որ ռուսաց լեզուն օտար լեզու չի ընկալվում Հայաստանում, թեեւ, իր ձեւակերպմամբ, այն պետական եւ պաշտոնական լեզու չէ մեր երկրում:
Հուլիսի 7-ին Կոմիտասի թանգարան-ինստիտուտում նա ափսոսանք հայտնեց, որ այսօր ռուսաց լեզվի «իրացման» շրջանակն ինչ-որ առումով փոքրացել է, բայց մյուս կողմից էլ՝ պահանջարկը հետագայում կմեծանա: «Ակտիվորեն զարգացող Եվրասիական միությունում ռուսաց լեզուն մեծ հեռանկար ունի, …ընդհանրապես հիմարություն է մտածելը, թե ռուսաց լեզուն Տոլստոյ ու Դոստոեւսկի կարդալու համար է, ռուսաց լեզուն կյանքում գործելու ու հաստատվելու համար է»,-ասաց Շվիդկոյը, որը հանդիպել էր նաեւ ԿԳ նախարար Լեւոն Մկրտչյանի հետ:
Նա նաեւ բերեց Վրաստանի օրինակը. «Վրաստանում ռուսաց լեզվի առաջ փակեցին դռները՝ բացելով դրանք անգլերենի առաջ: Բայց միեւնույն է, այնտեղ անգլերեն այնքան լավ չգիտեն, որպեսզի կարողանան պրոֆեսիոնալ կրթություն ստանալ: Մի խոսքով՝ ռուսերենի առաջ դռները փակելը մեծ սխալ է»:
Գոհար ՀԱԿՈԲՅԱՆ
