«Այսօր մի խումբ անձինք զինված ինքնաձիգներով եւ ատրճանակներով հարձակում են գործել Հայաստանի Հանրապետության պարեկապահակային ծառայության գնդի վրա, մուտք են գործել տարածք եւ այնտեղ բռնությամբ պահում են պատանդների»,- լրագրողների հետ զրույցում ասաց փոխոստիկանապետ Հունան Պողոսյանը:
Նա մանրամասնեց, որ պատանդները ոստիկանության ծառայողներ են. «Հարձակման ընթացքում սպանվել է ոստիկանության գնդապետ Արթուր Վանոյանը: Հրազենային վնասվածքներ են ստացել ոստիկանության գնդապետ Արամ Հովհաննիսյանը, ոստիկանության փոխգնդապետ Հրաչ Խոստեղյանը եւ ոստիկանության ենթասպա Գագիկ Մկրտչյանը, եւս մի քանի հոգի այլ մարմնական վնասվածքներ են ստացել: Ներկայումս բանակցություններ են նրանց հետ ընթանում: Ոստիկանությունը եւ բոլոր իրավապահ մարմինները առաջին իսկ վայրկյանից հորդորել եւ այժմ էլ հորդորում են հետ կանգնել հանցավոր մտադրություններից եւ հանձնվել իշխանություններին»:
Հունան Պողոսյանը ընդգծեց, որ ոստիկանությունը եւ իրավական համակարգը ունեն ուժեր եւ միջոցներ եւ ձեռնարկել եւ ձեռնարկելու են անհրաժեշտ կանխարգելիչ եւ օպերատիվ հետախուզական միջոցառումները. «Եթե մեր հորդորները չլսեն, մենք ի վիճակի ենք վնասազերծելու նրանց, որովհետեւ մարդասպանների հետ այլ կերպ չեն վարվում»:
Կարդացեք նաև
Փոխոստիկանապետը հայտնեց, որ ապստամբություն իրականացրած քաղաքացիների շարքում վիրավորներ չկան, բանակցությունները շարունակվում են: Նա հավելեց, որ վերջիններս պահանջում են ազատ արձակել Ժիրայր Սեֆիլյանին, ինչն, ըստ նրա, հնարավոր չէ:
Աշոտ ՀԱԿՈԲՅԱՆ
