Հուլիսի 21-ին «Պոստ Սկրիպտում» մամուլի ակումբի հյուրն էր Արտակարգ և լիազոր դեսպան Արման Նավասարդյանը: Նա խոսեց Թուրքիայի չստացված հեղափոխությունից եւ անդրադարձավ հայաստանյան վերջին դեպքերին:
«Հիմա, երբ Թուրքիայում կրքերը հանդարտվում են՝ դեպքերը մտնում են ավելի խաղաղ հունի մեջ: Ընդհանրապես բոլոր քաղաքական երեւույթները պետք է դիտարկել արտաքին եւ ներքին սեգմենտներով, կարծես թե Էրդողանի մոտ պետք է այսպիսի իրավիճակ լիներ: Էրդողանի քաղաքականությունը, եթե չասենք տապալվեց, ապա գոնե կրեց մեծ կորուստներ եւ եվրոպական ուղղությամբ, Ռուսաստանի հետ հարաբերությունները տապալվեցին, արաբական աշխարհում լիդեր դառնալու նկրտումները, ինքը նաեւ ունի նաեւ ներքին խնդիր: Ահազանգող հեղաշրջման փորձը, սակայն, կարծես փրկօղակ եղավ: Կա վարկած՝ արդյոք Էրդողանի կազմակերպածը չէր: Հիմա իրենք են ասում, որ դա ամերիկյան հետք է, ինչը ամերիկյան կողմը ժխտում է, բայց որ թուրք-ամերիկյան հարաբերությունները լարված են, դա փաստ է»,-ասաց պարոն Նավասարդյանը:
Ինչ վերաբերում է թուրքական հեղաշրջման փորձի՝ դրսից կազմակերպված լինելուն, դիվանագետը հետեւյալ կարծիքի է. « Կա՛մ իրոք կազմակերպվում է, կամ էլ եթե կազմակերպված չէ, սովորաբար ճկուն քաղաքական գործիչները շատ արագ մտնում են դրա մեջ եւ կարողանում են օգուտ քաղել կատարվածից: Էրդողանը համենայն դեպս այդ ամենից դուրս եկավ շատ ամրապնդված: Այսօրվա դրությամբ շատ համոզված քեմալականներ անցնում են նրա կողմը, նրա իսլամական կողմը ուժեղանում է, էլ չենք խոսում պառլամենտականների իրավունքների սահմանափակման, մահապատիժ մտցնելու մասին: Չնայած սրան՝ զուգահեռաբար ամերիկացիների հետ հարաբերությունները սկսում են էրոզիայի ենթարկվել: Զարմանալի է, որ հեղաշրջման փորձը համընկավ Ռուսաստանի հետ հարաբերությունների լավացմանը: Այսօրվա դրությամբ Թուրքիան Ռուսաստանի հետ ավելի է մոտենում սիրական ուղղությանը, քան Ամերիկայի հետ էր»:
Կարդացեք նաև
Արման Նավասարդյանը մի կանխատեսում էլ արեց. «Եթե հանկարծ Մեծ Քրդստան ստեղծվի, բոլոր կոմունիկացիաները կկտրվեն Իրանի կողմից, եւ Թուրքիան կսեղմվի երկու ծովերի արանքում»:
Դեսպանի ձեւակերպմամբ, ներկայումս գնում են խորը աշխարհաքաղաքական զարգացումներ, եւ Ռուսաստանը ամրապնդում է իր դիրքերը տարածաշրջանում, իսկ Թուրքիան էլ գոհ է, որ Ռուսաստանն իր հանդեպ լավ է տրամադրված:
«ՆԱՏՕ-ի կազմից դուրս գալը մեծ հարցական է, Թուրքիան հանդիսանում է ամենամեծ բանակը ՆԱՏՕ-ում, իսկ ԵՄ մտնելը գոնե գուշակելի ապագայում Թուրքիան թաղեց»,-ասում է բանախոսը:
Դիվանագետի ձեւակերպմամբ. «Եթե հանկարծ Էրդողանը որոշի լայնամասշտաբ հարձակում սկսել քրդերի ուղղությամբ, կարող է այնտեղ փնտրել հայկական եւ հունական հետքը, իսկ դա կարող է սրել իրավիճակը»:
Ինչ վերաբերում է Էրդողանին, Արման Նավասարդյանի խոսքերով. «Փորձված թանը անփորձ մածնից լավ է, Էրդողանի մնալը շատ ավելի լավ է Հայաստանի համար: Որքան հսկվող եւ միապետական պետություն լինի Թուրքիան, այդքան լավ է Հայաստանի համար»:
Գոհար ՀԱԿՈԲՅԱՆ
