Քիչ առաջ Սահմանադրական դատարանն անցավ խորհրդակցական սենյակ՝ որոշում կայացնելու «Սասնա ծռեր» խմբավորման անդամներ Պավլիկ Մանուկյանի և Վարուժան Ավետիսյանի դիմումների հիման վրա ՀՀ Քրեական դատավարության օրենսգրքի երկու հոդվածների՝ Սահմանադրությանը համապատասխանության հարցով: Գործը քննվում է գրավոր ընթացակարգով:
Պավլիկ Մանուկյանը եւ Վարուժան Ավետիսյանը դիմել են Սահմանադրական դատարան՝ հստակեցնելու ՀՀ քրեական դատավարության օրենսգրքի 283-րդ հոդվածի 1-ին մասի և 288-րդ հոդվածի 3-րդ մասի՝ ՀՀ Սահմանադրության համապատասխանության հարցը։ ՀՀ քրեական դատավարության օրենսգրքի 283-րդ հոդվածի 1-ին մասը սահմանում է քննչական գործողություններ կատարելու և դատավարական հարկադրանքի միջոցներ կիրառելու մասին միջնորդությունների քննարկման կարգը. 1-ին մասի սահմանմամբ՝ միջնորդությունները քննում է դատավորը միանձնյա, դռնփակ դատական նիստում` միջնորդությամբ դիմած պաշտոնատար անձի կամ նրա ներկայացուցչի մասնակցությամբ:
Վիճարկվող ՀՀ քրեական դատավարության օրենսգրքի 288-րդ հոդվածն էլ առնչվում է խափանման միջոցը կալանքն ընտրել- չընտրելու որոշման օրինականության և հիմնավորվածության հարցին։ Հոդվածի 3-րդ մասի համաձայն՝ դատական ստուգումը կատարվում է դռնփակ դատական նիստում` դատախազի և պաշտպանի մասնակցությամբ: Բողոքը քննելու օրվա մասին նախապես իրազեկ կողմի չներկայանալը չի խոչընդոտում դատական ստուգումն իրականացնելուն: Դատարանը բացատրություններ տալու համար դատական նիստին կարող է կանչել հետաքննության մարմնի աշխատակցին կամ քննիչին, նաև տուժողին:
Կարդացեք նաև
Գործով զեկուցող էր նշանակվել ՍԴ անդամ Հրանտ Նազարյանը: Պատասխանող կողմն ՀՀ Ազգային ժողովն է, որպես ակտն ընդունած մարմին։
Զեկուցող Հրանտ Նազարյանն ասաց, ուսումնասիրվել են Պավլիկ Մանուկյանի և Վարուժան Ավետիսյանի նկատմամբ կիրառված խափանման միջոցի դատաքննության վերաբերյալ նյութերը եւ հետևություններ են արվել։ Ըստ զեկուցողի, պատասխանող կողմը չի ընդունել դիմողների փաստարկները՝ համարելով, որ վիճարկվող նորմերը սահմանադրական են։
Նելլի ԳՐԻԳՈՐՅԱՆ
