Ինչպես տեղեկացրել ենք, այսօր ԱԺ 10-րդ նստաշրջանի մեկնարկն է, եւ պատգամավորները հարցեր ուղղեցին ԱԺ նախագահ Գալուստ Սահակյանին:
ԲՀԿ խմբակցության պատգամավոր Տիգրան Ուրիխանյանը հիշեցրեց «Սասնա ծռերի» դեպքը եւ այն, որ ընդդիմադիր պատգամավորները ստորագրել էին արտահերթ նիստ հրավիրելու՝ հուլիսին տեղի ունեցած հայտնի դեպերի հետ կապված. «Ես ակնկալում եմ, որ հիմա օրակարգում մի կետ կմտցնենք եւ քննարկում կիրականացնենք»: Ըստ Ուրիխանյանի, ԱԺ-ն պետք է արձագանքի ցուցարարների նկատմամբ իրականացված բռնություններին եւ պատասխանատվության կանչի իշխանության ներկայացուցիչներին՝ անգործության եւ այլ իրավախախտումների համար:
Գալուստ Սահակյանն արձագանքեց. «Շատ ցցուն հայտարարություն էր: Մենք ինքներս էլ ենք շահագրգռված, որ ամեն ինչ ճիշտ ճանապարհով լուծվի: ԱԺ արտահերթ նիստ հրավիրելու մասին պիտի ասեմ, որ քրեական գործ է հարուցվել եւ հակասահմանադրական է, որ հենց սկզբից ԱԺ-ն որոշում կայացնի: Մեր ամբողջ հասարակությունը ուշի-ուշով հետեւում է այդ գործընթացի ավարտին»:
Տիգրան Ուրիխանյանն արձագանքեց. «Ասում եք՝ ցնցող հայտարարություն էր: Ցնցողը գիտե՞ք որն էր, որ ամռանը արտասահմանից զանգեր էի ստանում, մարդիկ ասում էին՝ ձեր երկրում ի՞նչ է կատարվում, ժողովուրդը արդեն դիմել է ծայրահեղ քայլի, իշխանություններն էլ արձագանքում էին բացարձակապես անհամարժեք, քաղաքացիական պատերա՞զմ է սկսում: Այ սա է ցնցողը: Ծայրահեղն այն է, որ զոհվեցին մարդիկ, մարդիկ արդեն անբացատրելի միջոցների են դիմում: Բա մենք չանդրադառնա՞նք դրան, մարդիկ ծեծվեցին»:
Կարդացեք նաև
Հռիփսիմե ՋԵԲԵՋՅԱՆ
