ՀՀԿ-ական պատգամավոր Լեռնիկ Ալեքսանյանը վստահեցնում է, որ ՀՀ իշխանությունները Արտաքին գործերի եւ Սփյուռքի նախարարությունների միջոցով կապի մեջ են Սիրիայում ՀՀ դեսպանատան հետ, եւ Հալեպը լքել ցանկացող մեր հայրենակիցները կարող են դիմել` Հայաստան տեղափոխվելու նպատակով: «Ովքեր ցանկություն ունեն գալ Հայաստան, իշխանություններն ընդունում են, հետո նոր անգամ չեղած պայմաններում մտածում նրանց կեցության մասին: Իշխանությունները պատրաստակամ են նրանց ընդունել»,-այսօր «Հայելի» մամուլի ակումբում հայտարարեց նա:
Լրագրողի նկատառմանն ի պատասխան, որ, օրինակ, https://www.arevelk.am/am/ arevelk.am-ի միջոցով որոշ սիրիահայեր ՀՀ իշխանություններին խնդրում են գոնե կողմնորոշել փաստաթղթավորման հարցում, Լեռնիկ Ալեքսանյանն ասաց, որ Սփյուռքի նախարարությանը պետք է դիմում գրել:
Ասուլիսի մեկ այլ բանախոս` ԱԱԾ նախկին պաշտոնյա Գուրգեն Եղիազարյանը միջամտեց. «Հալեպը ռմբակոծության տակ է, պատկերացնո՞ւմ եք` ինչպե՞ս են գրելու»:
Լեռնիկ Ալեքսանյանն էլ առարկեց, թե դրա համար դեսպանատուն գոյություն ունի: Գուրգեն Եղիազարյանն էլ թե. «Մարդիկ համացանցով են խնդրում, որ գումար չունեն դուրս գալու համար, ճարահատյալ այդպես դիմում են մայր Հայաստանին»:
Կարդացեք նաև
«Համացանցը շատ քիչ է»,-պնդեց Լեռնիկ Ալեքսանյանը:
Aravot.am-ի հարցին ի պատասխան, թե ինչ է անում ՀՀ իշխանությունը` տեղում սիրիահայերին օժանդակելու եւ Սիրիայի կառավարական զորքերի միջոցով նրանց անվտանգ տարհանումը կազմակերպելու համար, ՀՀԿ-ական պատգամավորն ասաց. «Դեսպանատունը կապի մեջ է ՀՀ կառավարության հետ, տեղեկությունները հավաքում է եւ Սփյուռքի նախարարության միջոցով տեղեկացնում կառավարությանը: Չկա մեկի դիմում, որին արձագանքած չլինեն: Իմ տեղեկությունն այսպիսին է»:
Նկատեցինք, որ սիրիահայերի տարհանումը կազմակերպելու համար պետական միջամտություն է պետք, սակայն Լեռնիկ Ալեքսանյանը նշեց, որ դրա համար սիրիահայերը ՀՀ գալու ցանկություն պետք է հայտնեն: Հիշեցրինք, որ այդպիսիք 600-ն են: «Չի եղել ցանկություն, դիմում, որ արձագանք չունենա` լինի ֆինանսական, թե տեղափոխման…»,-շարունակեց պնդել Լեռնիկ Ալեքսանյանը…
Լուիզա ՍՈՒՔԻԱՍՅԱՆ
