Ապօրինի հարստացումը քրեականացնելու մասին օրենքը կարող է գործել միայն մի պարագայում` եթե մեր երկիրն ունենա անկախ դատաիրավական համակարգ: Նման կարծիք ունի Հայաստանի հելսինկյան կոմիտեի նախագահ, իրավապաշտպան Ավետիք Իշխանյանը:
«Քանի մենք չունենք այդ անկախ դատաիրավական համակարգը եւ այդ ողջ համակարգը գտնվում է նախագահի վերահսկողության տակ, ապա օրենքն ընդունվելու է միջազգային հանրությանն ի ցույց դնելու համար: Այդ օրենքը կարող է աշխատել միայն այն դեպքում, եթե հստակ ցուցում լինի այս կամ այն բիզնեսմենին պատժելու համար, ինչպես, եթե հիշում եք, 2015 թվականին հանրապետության նախագահն ասաց, որ կարող է մարդկանց ուղարկել ստուգման Ծառուկյան Գագիկի տարբեր հաստատությունները: Եթե որևէ գործարար փորձի ինքնուրույն քայլեր անել, ապա այդ օրենքը չի գործի»,- խորհրդարանում, մի քանի լրագրողների հետ զրույցում ասաց իրավապաշտպանը:
Ըստ Ավետիք Իշխանյանի, եթե օրինակ անխա լինեին դատական համակարգի մարմինները` քննչական կոմիտեն, դատախազությունը եւ դատարանները, եւ ցուցումներով չառաջնորդվեին, ապա պատժի կենթարկվեին այն ոստիկանները, ովքեր ցույցերի ժամանակ ծեծի էին ենթարկել խաղաղ ցուցարարներին ու լրագրողներին:
Դիտարկմանը, թե վարչապետ Կարեն Կարապետյանի հայտարարությունը, նրա կատարած առաջի քայլերը հասարակության մոտ հույսեր են արթնացրել, իրավապաշտպանն ասաց. «Ուրախ եմ, որ մեր հասարակությունը հույսեր ունի, որովհետեւ առանց հույսի ապրելը շատ բարդ է: Բայց արդյո՞ք մի քանի օրվա մեջ մեր իշխանությունների հոգեբանությունը փոխվեց, ես չեմ հավատում»:
Կարդացեք նաև
Նելլի ԳՐԻԳՈՐՅԱՆ
