Ինչպես տեղեկացրել ենք, ԱԺ Մարդու իրավունքների եւ հանրային հարցերի հանձնաժողովում քննարկվեց «Կուսակցությունների մասին» օրենքը, որը ներկայացրել էր կառավարությունը:
Արդարադատության նախարար Արփինե Հովհաննիսյանն ասաց, որ նախագիծը ներկայացրել են Վենետիկի հանձնաժողովին եւ հանձնաժողովի կարծիքը ԱԺ լիագումար նիստին կներկայացնի:
Ըստ նախարարի, բազմաթիվ կուսակցություններ կան ՀՀ-ում, որոնք քաղաքական որեւէ դերակատարում չեն ստանձնել: Դրա համար հիմա առաջարկում են, որ կուսակցությունը ստեղծելիս մի քիչ պատշաճ ձեւով ներկայանան՝ գոնե 1000 անդամ ունենան. «Քանի կուսակցության անուն գիտեք այստեղ նստածներդ, կհաշվառեք, 10-ը կանցնի՝ կասենք լավ է»:
Հանձնաժողովի նախագահն ասաց, որ ինքը հաշվեց, 13 կուսակցության անուն գիտի:
Կարդացեք նաև
Նախագծում նաեւ նշված է, որ կուսակցության հիմնադիր համագումարում կարեւոր որոշումներին, կանոնադրության քվեարկությանը պետք է հիմնադիր 100 անդամները միաձայն քվեարկեն:
Սպարտակ Մելիքյանը հարցրեց. «Ասենք, 3 հոգով որոշել ենք կուսակցություն ստեղծել, հավաքել ենք էդ 1000 հոգին եւ, ասենք, ինչ-որ մեկը մտածում էր, որ նախագահը այս մարդը կլինի, բայց գործընթացի ժամանակ տեսնում է, որ նախագահը մյուսն է, իրեն դուր չի գալիս, դեմ է քվեարկում եւ ստացվում է՝ տապալեց բոլորի աշխատա՞նքը: Միգուցե այդ շեմն իջեցնել է պետք, թող լինի 2/3-րդը, թող այդքան խիստ սահմանափակում չլինի՝ 100 հոգի: 100 հոգուց, ոնց էլ լինի, մեկը կարող է չուզող լինի ու գա խանգարի»:
Արփինե Հովհաննիսյանն արձագանքեց. «Եթե հիմնադրման փուլում չուզողներից ենք խոսում, ուրեմն.,.»:
Էլինար Վարդանյանը հարցրեց՝ իրավունք չունի՞ հիմնադիր անդամը որեւէ կետի հետ կապված վերապահում ունենա եւ ձեռնպահ քվեարկի: Նախարարը պատասխանեց, որ իրենք հեշտացման տարբերակ են որոշել, բայց քննարկման ենթակա է. «Պետք է հասկանանք՝ կուսակցության ստեղծման այս նվազագույն պահանջները պետք է դրվեն: Գոնե 100 հոգին պետք է մի ուղղությամբ նայեն, միեւնույն գաղափարախոսությունը կիսեն: Մարդը կուսակցություն է եկել բացի, ինքն իրեն ընդդիմությո՞ւն է խաղում, որ դեմ քվեարկի»:
«Կուսակցությունների մասին» նախագծին հանձնաժողովում միաձայն կողմ քվեարկեցին:
Հռիփսիմե ՋԵԲԵՋՅԱՆ