Կառավարության նոյեմբերի 24-ի նիստի օրակարգում ներառված է հանրապետության որոշ ճանապարհների հիմնանորոգման համար գումար հատկացնելու որոշման նախագիծը: Այս նախագծի հեղինակ տրանսպորտի, կապի եւ տեղեկատվական տեխնոլոգիաների նախարարությունն առաջարկում է Տրանսպորտային օբյեկտների հիմնանորոգում ծրագրի խնայված միջոցներից կատարել վերաբաշխում՝ 349 միլիոն դրամի չափով:
Նախագծում նշված է. «Ձյունառատ ձմռան եւ դրան հետեւած անձրեւների հետեւանքով հանրապետության մի շարք միջպետական եւ հանրապետական նշանակության ավտոճանապարհների որոշ հատվածներում տեղի են ունեցել փլուզումներ, ճանապարհահատվածները դարձել են ոչ երթեւեկելի եւ խոչընդոտում են անվտանգ երթևեկության ապահովմանը: Ուստի անհրաժեշտություն է առաջացել իրականացնել Մ-4-Պտղնի-Գետամեջ 4,925 կմ երկարությամբ ճանապարհահատվածի սողանքային երեւույթների հետեւանքների վերացման եւ անցանելիության ապահովման աշխատանքներ»:
Առաջարկվում է վերաբաշխված 349 միլիոն դրամից 76 միլիոնն ուղղել նշված օբյեկտի հիմնանորոգման եւ նախագծային աշխատանքներին, իսկ 272 միլիոն դրամը՝ կառավարության պահուստային ֆոնդին: Շինարարական եւ նախագծային աշխատանքների, տեխնիկական հսկողության ծառայությունների գնման ձեւը՝ «բանակցային ընթացակարգ հայտարարությամբ»:
Նելլի ԲԱԲԱՅԱՆ
