Այս տարի մայրաքաղաքի փողոցների ձյան եւ սառույցի մաքրման աշխատանքներ, կարելի է ասել, գրեթե չեն իրականացվում: Համենայնդեպս, բակային փողոցները սառույցի հաստ շերտի տակ թաղված են, ու բավական երկար ժամանակ: Այսինքն՝ այնպես չէ, որ նոր են սառցակալել փողոցները, ու համապատասխան աշխատակիցները դեռ չեն հասցրել մաքրել:
Երեկ առավոտյան Մալաթիա-Սեբաստիա վարչական շրջանի բակային փողոցներից մեկում ականատես եղանք, թե ինչպես մի տարեց կին սառույցի վրա չկարողանալով քայլել՝ սայթաքեց եւ վայր ընկավ: Բարեբախտաբար, այս կինը կոտրվածք չունեցավ, բայց անեծքների տարափ հնչեցրեց պատասխանատուների հասցեին:
Տարեց կինը Երեւանի քաղաքապետին ու մյուս պատասխանատուներին, ինչպես մեզ հետ զրույցում ասաց, հրավիրում է քաղաքի բակային փողոցներ, իջնել իրենց հարմարավետ ավտոմեքենաներից ու փորձել մի քանի մետր ոտքով քայել ու հասկանալ շարքային քաղաքացիների վիճակը:
Երեկ Երեւանի քաղաքապետ Տարոն Մարգարյանը, ըստ քաղաքապետարանի պաշտոնական հաղորդագրության, հանձնարարել է խստորեն վերահսկել բակերի եւ միջբակային տարածքների ձնամաքրման եւ ձնահեռացման աշխատանքները:
Քաղաքապետը վստահեցրել է, որ մայրաքաղաքի կենտրոնական բոլոր փողոցները մաքրված են եւ երթեւեկելի, սակայն երկրորդական շատ փողոցներում, մայթերին, գրեթե բոլոր բակերում եւ միջբակային տարածքներում դեռ ունեն անելիքներ:
Կարդացեք նաև
Մարգարյանը մեղքը բարդել է ցուրտ եղանակի եւ սանմաքրման աշխատանքներն իրականացնող ընկերության վրա՝ նշելով. «Տեւական ցուրտ եղանակն էլ իր հերթին է նպաստել, որ ոչ պատշաճ իրականացված աշխատանքների արդյունքում մասնավորապես բակային տարածքներում գոյանան սառույցի շերտեր, որոնք մեծ անհարմարություններ են պատճառում մեր համաքաղաքացիներին: Ակնհայտ է, որ ստեղծված իրավիճակը մայրաքաղաքում սանմաքրման աշխատանքներն իրականացնող ընկերության թերի աշխատանքի արդյունք է»: Ապա նա հանձնարարել է խստորեն վերահսկել նշված ուղղություններով իրականացվող աշխատանքների ողջ ընթացքը, նաեւ հանձնարարել, որ բոլոր համատիրություններն ապահովվեն աղի եւ ավազի խառնուրդի անհրաժեշտ պաշարով:
Փաստորեն, մինչ քաղաքապետարանի աշխատակազմը 9 օր տոներն ու ձմեռային արձակուրդն էր վայելում, պատասխանատու ընկերությունը վերահսկողությունից դուրս էր ու «նեղություն» չէր քաշում իր գործառույթն իրականացնել:
Թե այս հանձնարարությունից հետո «մեղավոր» ընկերությունն ինչպե՞ս կվերահսկվի եւ կմաքրի՞ փողոցները սառույցներից՝ 1-2 օրից պարզ կլինի:
ՆԵԼԼԻ ԲԱԲԱՅԱՆ
«Առավոտ»
11.01.2017
