«Հավատացեք, աշխարհում առաջին հերթին հաշվի են նստում ուժեղի հետաքրքրությունների հետ, այլ ոչ թե մուրացկանի: Այդ դեպքում կարիք չենք ունենա որեւէ մեկի գնահատականին»,- մեզ հետ զրույցում նշեց Արցախի Հանրապետական կուսակցության համանախագահ, «Հելսինկյան նախաձեռնություն-92»-ի ԼՂՀ կոմիտեի համակարգող, իրավապաշտպան Կարեն Օհանջանյանը` անդրադառնալով ԵԱՀԿ Մինսկի խմբի համանախագահների վերջին հայտարարությանը, որը բավական քննադատվեց Հայաստանում: «Ժամանակակից աշխարհում հարցերն արդեն նավթը եւ դրամը չեն լուծում, ամեն ինչ լուծվում է մարդկային ռեսուրսների մակարդակով:
Այն, ինչ անհրաժեշտ է մեր մարդկային ռեսուրսների զարգացման համար, դա խղճով քաղաքական իշխանություն ունենալն է: Ցավոք, ստիպված եմ փաստել, որ Հայաստանի քաղաքական իշխանությունը կորցրել է այդ արժեքավոր հասկացությունը կոռուպցիայի եւ քավոր-սանիկ-բարեկամության դռների հետեւում: Յուրաքանչյուր հայի պարտքն է պայքարել այդ չարիքի դեմ եւ երկիրը վերադարձնել նորմալ մարդկային ապրելակերպի: Մենք պետք է գիտակցենք, որ գողանալով այսօր՝ մենք գողանում ենք մեր երեխաների, մեր ժողովրդի ապագան»,- նկատեց ղարաբաղցի իրավապաշտպանը:
Կարդացեք նաև
«Առավոտ»
22.01.2017
