ՀՎԿ-ն իր նախընտրական ծրագրով առաջարկվում է չեղարկել գործող հիփոթեքային բարձր տոկոսադրույքները: Այսօր կուսակցության նախընտրական ծրագիրը ներկայացնելիս ասաց «Հայկական վերածնունդ» կուսակցության առաջնորդ Արթուր Բաղդասարյանը:
«Անհեթեթ է, որ բանկը բնակարանը տնօրինում է մինչեւ ամբողջ գումարի վճարումը եւ դրա հետ մեկտեղ տոկոսներ է վերցնում: Չէ՞ որ բանկը մարդու հնարավորությունները պարզում է մինչեւ վարկը տրամադրելը»,- ասաց պարոն Բաղդասարյանը:
Նա քննադատեց նաեւ Հայաստանում գործող տեսանկարահանող սարքերի ու Երեւանում գործող «կարմիր գծերի» առկայությունը, նշելով, որ այդ համակարգը թալանում է ժողովրդին: Ըստ նրա, թեեւ տեսահսկումը ճանապարհատրանսպորտային պատահարների նվազեցման նպատակով է ներդրվել, բայց իրականում վթարների թիվը դրանից չի նվազել, հակառակը՝ 17 տոկոսով աճել է, իսկ զոհերի թիվը՝ 27 տոկոսով:
«Վերջին մեկուկես տարում ճանապարհային երթեւեկության կանոնների խախտման մոտ 2 մլն 536 ակտ է կազմվել, այսինքն՝ յուրաքանչյուր վարորդի բաժին է ընկել գրեթե 7 տուգանք: Դրամական համարժեքով բնակչությունից ավելի քան 24 մլրդ դրամ է հավաքվել: Հաշվի չի առնվել Հայաստանում տարածված «մաղարիչի» համակարգը»:
Կարդացեք նաև
ՀՎԿ-ն ընտրվելու դեպքում կվերանայի նաեւ տուգանքների չափերը, պարոն Բաղդասարյանի խոսքով. «Առանձին քննարկման հարց է տուգանքների մեծությունը»:
Արփինե ՍԻՄՈՆՅԱՆ
