Մալաթիա-Սեբաստիա վարչական շրջանում ՀՎԿ ցուցակով առաջադրված պատգամավորի թեկնածու Հեղինե Բիշարյանի համար այդ ընտրատարածքը բավականին բարդ տարածք է:
«Փողի մրցակցություն կա, բոլոր բնակիչներն էլ խոսում են այդ մասին, կան քաղաքացիներ, որոնց հետ խոսում ենք, ասում են՝ մեր ընտրությունն արդեն կատարել ենք, մեզ ցուցակագրել են քսան հազարով, ամեն տեղ խոսում են փողից, ցուցակագրումից, դա անհավասար դաշտ է ստեղծում մրցակցողների միջեւ, այդ առումով բարդ տարածք եմ համարում»,- ասաց Հեղինե Բիշարյանը:
Նրա խոսքով, ահազանգեր ունեն նաեւ որ ընտրողներին տեղահան են անում, գրանցում տարբեր տարածքներում՝ պարտադրելով քվեարկել այնպես, ինչպես իրենք են ուզում: Տիկին Բիշարյանը չհստակեցրեց, թե հատկապես որ քաղաքական ուժերն են ընտրակաշառք բաժանում, քաղաքացիներին էլ տարբեր տարածքներում միաժամանակ գրանցում:
Անդրադառնալով իրենց ընտրացուցակի թեկնածուներին, որոնց մոտ կեսը երիտասարդ գործազուրկներ են, տիկին Բիշարյանն ասաց. «Բնականաբար, շատ լավ կլիներ, որ հենց գործազուրկները հայտնվեին խորհրդարանում, այլ ոչ թե գործարար, բիզնեսմենները եւ օլիգարխները, որոնք նույնիսկ մեկ օրենքի վերնագիրը չգիտեն, նույնիսկ չգիտեն՝օրենքի նախագիծն ինչպես է օրենք դառնում: Հենց գործազուրկները պետք է հայտնվեն այնտեղ, որտեղ աշխատանք կա»:
Կարդացեք նաև
Արփինե ՍԻՄՈՆՅԱՆ
