Երեւանի մամուլի ակումբում Հայաստանի ԶԼՄ-ներում, հեռարձակվող ԶԼՄ-ներում Ազգային ժողովի 2017 թվականի ընտրությունների լուսաբանման մշտադիտարկում է իրականացնում: Ինչպես արդեն տեղեկացրել ենք, ԵՄԱ նախագահ Բորիս Նավասարդյանը մարտի 27-ին լրագրողներին ներկայացրեց միջանկյալ հաշվետվությունը՝ փետրվարի 15-մարտի 4, մարտի 5-18 ժամանակահատվածների համար: Հետազոտվել են 5 հեռուստաալիքներ՝ Հայաստանի հանրային հեռուստաընկերությունը, «Արմենիա», «Շանթ», «Երկիր մեդիա», «Կենտրոն»:
Մարտի 29-ին նույն թեմայով կազմակերպվել էր կոնֆերանս, որին հրավիրված էին խորհրդարանական ընտրություններին մասնակցող բոլոր 9 ուժերը, սակայն, միայն Հայաստանի կոմունիստական կուսակցության ներկայացուցիչ Երջանիկ Ղազարյանը չէր մասնակցում կոնֆերանսին:
Միջոցառման ընթացքում ԶԼՄ-ների էթիկայի Դիտորդ մարմնի համակարգող Մեսրոպ Հարությունյանը տեսանյութերի օրինակով ներկայացրեց ընտրությունների լուսաբանման էթիկական հարցերը հետազոտվող հեռուստաալիքներում:
Ինչից հետո քաղաքական ուժերի ներկայացուցիչները արտահայտեցին իրենց կարծիքը՝ զանգվածային լրատվության միջոցների աշխատանքի վերաբերյալ: «Ազատ դեմոկրատներ» դաշինքի ներկայացուցիչ Անժելա Խաչատրյանն ասաց, որ դաշինքն, ընդհանուր առմամբ գոհ է քարոզարշավների ընթացում լրատվամիջոցների աշխատանքից: Սակայն, նա նշեց, որ առցանց լրատվամիջոցները քարոզարշավին այդքան էլ ուշադրություն չեն դարձնում եւ քիչ են լուսաբանումները:
Կարդացեք նաև
Հայաստանի Հանրապետական կուսակցության անդամ Սամվել Ֆարմանյանը ասաց, որ չափազանց ուրախ է արձանագրել, որ Հայաստանի հանրային հեռուստաընկերությունը չի դարձել քննադատությունների թիվ 1 թիրախը:
Հայ հեղափոխական դաշնակցություն կուսակցության անդամ, «Երկիր մեդիա» հեռուստաընկերության հասարակական-քաղաքական հաղորդումների պատասխանատու Գեղամ Մանուկյանը ասաց, որ ՀՅԴ-ն շատ մեծ ուշադրություն չի դարձնում հեռուստաեթերին, որովհետեւ համարում են, որ առցանց լրատվամիջոցները ավելի մեծ դերակատարներ են: Եվ Դաշնակցությունը հնարավորինս քիչ վճարովի հեռուստաեթեր է օգտագործել:
Կոնգրես-ՀԺԿ դաշինքի ներկայացուցիչ Սամվել Կարաբեկյանը ասաց, որ զեկույցում արձանագրված դրական միտումների պատճառներից է նախընտրական շրջանների կարգավորումների մեխանիկորեն ենթարկվելու պարտավորությունը:
«Ելք» դաշինքի անդամ Արայիկ Հարությունյանը նկատեց, որ լրատվամիջոցները քարոզարշավը համեմատաբար ավելի հավասար են լուսաբանում: Սակայն, նա լուրջ խնդիրներ է նկատում լրատվամիջոցների ազատության հարցում:
«Ծառուկյան» դաշինքի ներկայացուցիչ Վահե Էնֆիաջյանը անդրադարձավ հեռուստաընկերությունների՝ նույնաբովանդակ սյուժե ներկայացնելու երեւույթին. «Տեխնիկապես հաճախ այնպես է ստացվում, որ հեռուստաընկերության ներկայացուցիչը չի կարողանում հատկապես մարզային այցին ներկա գտնվել եւ պայմանավորվում են, նյութերը փոխանակում են, որպեսզի տվյալ այցը լուսաբանվի»:
Հայկական վերածնունդ կուսակցության անդամ Էդգար Առաքելյանն էլ անդրադարձավ բանավեճերին եւ ասաց, որ կուսակցությունը չի հրաժարվել մասնակցել բանավեճերին եւ միշտ ակտիվ մասնակցել է:
Եվ «Օհանյան-Րաֆֆի-Օսկանյան» դաշինքի անդամ Անդրանիկ Գրիգորյանը հայտնեց, որ հեռուստաալիքների՝ դաշինքին հատկացված ժամերի քանակական առումով խնդիր չեն տեսնում, սակայն «ՕՐՕ»-ն խնդիրներ է ունենում որակական կողմի հետ կապված:
Ամի ՉԻՉԱԿՅԱՆ
