Այսօր «Հայացք» ակումբում «Ելք» դաշինքի անդամ Նիկոլ Փաշինյանին լրագրողները խնդրեցին մեկնաբանել առաջին նախագահ Լեւոն Տեր-Պետրոսյանի՝ «Ուրվագիծ» հաղորդմանը «Ելք» դաշինքի ծրագրի հետ կապված քննադատությանը, որ ըստ ձեզ, Ղարաբաղի հարցը չի լուծվելու:
Նիկոլ Փաշինյանը պատասխանեց. «Եթե մեր ասածը մեկնաբանում է այդպես, իր ասածն էլ նշանակում է հետեւյալը, որ Ղարաբաղը երբեք ինքնորոշված չի լինելու, ինքնորոշման իրավունքը երբեք չի ճանաչվելու: Եթե ինքը էդպես է մեկնաբանում, ես էլ էդպես եմ մեկնաբանում: Պարոն Տեր-Պետրոսյանը, իր համախոհները խոսում են ինչ-որ լուծման տարբերակի մասին: Մադրիդյան սկզբունքներում երեք սկզբունք կա՝ ուժի եւ ուժի սպառնալիքի կիրառում, ազգերի ինքնորոշման իրավունքը եւ տարածքային ամբողջականություն: Ադրբեջանը երեք սկզբունքներից երկուսը արհամարհում է, անընդհատ գործում է ուժի եւ ուժի կիրառման սպառնալիք, հստակ ասում է, որ իրենք երբեւէ չեն ճանաչելու ԼՂՀ ժողովրդի ինքնորոշման իրավունքը: Փոխզիջում՝ նշանակում է փոխզիջում, իսկ իրենք ի՞նչ են զիջում: Պարոն Տեր-Պետրոսյանի եւ իշխանությունների ասած փոխզիջումը զիջում է»:
Նիկոլ Փաշինյանն ասաց, որ երբ հակառակորդները հայտարարում են, որ Երեւանում են թեյ խմելու, Սեւանում չգիտեմ ինչ են անելու, այս տարբերակով, որ իրենք առաջարկում են, նշանակում է՝ Ադրբեջանին մոտեցնել Երեւանին, Սեւանին:
Դիտարկմանը՝ երբ համագործակցում էիք ՀԱԿ-ի հետ ՀԱԿ դաշինքում, առաջին նախագահի դիրքորոշումը ԼՂ հարցում նույնն էր՝ Փաշինյանը արձագանքեց՝ այն ժամանակ Տեր-Պետրոսյանը երբեք հանդես չի եկել այն դիրքորոշումով, ինչ հիմա., «Ինքը կարող է ունենա միշտ նույն դիրքորոշումը, բայց այն համաժողովրդական շարժումը, որը ձեւավորած է եղել, 18 ուժերից է կազմված եղել, այդ 18-ից ընդամենը երկուսն են պաշտպանում այդ դիրքորոշումը: Երբ խոսում են փոխզիջման մասին, ասում եք՝ երբեք իր դիրքորոշումը չի փոխվել, ես համարում եմ, որ քաղաքականության մեջ 97-ին եւ 2017-ին ունենալ նույն դիրքորոշումը, երբ աշխարհը փոխվել է, ՀՀ-ում մթնոլորտ է փոխվել՝ ես համարում եմ, որ այնքան էլ ճիշտ չէ»:
Կարդացեք նաև
Լրագրողները Նիկոլ Փաշինյանից հետաքրքրվեցին՝ ինչո՞ւ եք ջնջել ձեր կայքէջը, արդյոք Լեւոն Տեր-Պետրոսյանի հետ կապված նախկին դիրքորոշման, գրառումների պատճառով: Նա պատասխանեց, որ nikolpashinyan.com էջը փակվել է, քանի որ պրովայդերից նամակներ է ստացել, որ իր էջը գտնվում է հարձակման տակ, իրենք զգուշացրել են եւ անվտանգության նկատառումներով ժամանակավորապես փակել են. «Դա անհեթեթություն է, ես որեւէ իմ գրած, իմ արտասանած որեւէ բառ երբեք չեմ հեռացնում»:
Հռիփսիմե ՋԵԲԵՋՅԱՆ
