Այսօր Սահմանադրական դատարանը հրապարակելու է իր որոշում՝ ՀԱԿ-ՀԺԿ դաշինքի ներկայացրած դիմումի հետ կապված:
Հիշեցնենք, որ ՍԴ-ում վիճարկվում է ԱԺ ընտրությունների արդյունքների վերաբերյալ ԿԸՀ կայացրած որոշումը:
Մինչ ՍԴ-ն կհրապարակի վճիռը, ՀԱԿ-ՀԺԿ դաշինքի շտաբի պետ Լեւոն Զուրաբյանը դատարանում հանդես եկավ իր եզրափակիչ ելույթով: Նա ասաց. «Որ ՀՀԿ-ի օգտին ընտրողների վրա ճնշումներ են գործադրել իշխանության հետ սերտաճած մասնավոր ընկերությունների սեփականատերերը, ովքեր այնուհետեւ ՀՀԿ ցուցակով դառնում են պատգամավոր եւ Սահմանադրության խախտմամբ համատեղում ձեռնարկատիրոջ եւ պատգամավորի կարգավիճակները՝ գիտեն բոլորը: Այդ ամենի մասին գիտեն նաեւ ԵԱՀԿ/ԺՀՄԻԳ-ի դիտորդները, որոնց համապատասխան հայտարարությունները բազմիցս ընթերցվեցին: Բայց սրա մասին, պարզվում է, չգիտեն նրանք, ում գլխավոր առաքելությունն է վերահսկել ընտրությունների օրինականությունը երկրում եւ ում գլխավոր պարտականությունն է նման հանցագործությունների բացահայտումը եւ մեղավորներին պատժումը, այսինքն՝ ԿԸՀ-ն, դատախազությունը եւ ոստիկանությունը»:
Նա ասաց, որ տարիներ շարունակ այս կառույցները իրենցից պահանջում են ընտրախախտումների կոնկրետ ապացույցներ, ինչը հիմա իրենք տալիս են. «Այստեղ է, որ բացվում է նրանց իրական դեմքը: ԿԸՀ-ն, դատախազությունը, ոստիկանությունը զբաղված են ոչ թե այդ հանցագործությունների բացահայտմամբ, այլ դրանց պարտակումով»:
Կարդացեք նաև
Դանիել Իոաննիսյանի կատարած ձայնագրությունները ցույց են տալիս, որ ՀՀԿ-ն հանձնարարություն է տվել դպրոցների եւ մանկապարտեզների վարիչներին, որ իրենց աշակերտների ծնողներին ցուցակագրեն ու ցուցակները տան մարզպետարաններին, տեղական ինքնակառավարման մարմիններին: Խոսքը 380 հազար աշակերտների եւ մանկապարտեզային տարիքի երեխաների ծնողների մասին է:
Զուրաբյանը վստահեցրեց, որ ԿԸՀ-ն որեւէ բացատրություն էլ վարույթի ընթացքում տնօրեններից չի վերցրել. «Մուկուչյանն ակնհայտ ստում է եւ պարտակում հանցագործությունը»:
Նա ասաց, որ ԿԸՀ որոշումը չի արտահայտում ժողովրդի ազատ կամքը եւ պետք է ճանաչվի անվավեր:
Հռիփսիմե ՋԵԲԵՋՅԱՆ
