Գլխին հասցված ցանկացած ուժեղ հարվածը, բարձր տեղից անկումը կամ նույնիսկ բարձր տեղից ցատկելը կարող է ուղեղի ցնցման պատճառ հանդիսանալ։
Եթե գլխուղեղի ցնցում ստանալուց հետո տուժածը ժամանակին համապատասխան բուժում չստանա, հետագայում կարող են ի հայտ գալ ոչ ցանկալի հետեւանքներ (գլխացավեր, էպիլեպսիա եւ այլն)։
Ախտանշաններն են՝ գիտակցության կարճատեւ կորուստ, տեսողության խանգարումներ, հիշողության խանգարումներ, գլխացավ, գլխապտույտ, սրտխառնոց, փսխում, ոտքերի եւ ձեռքերի ընդարմացում, տարածության մեջ կողմնորոշման խանգարում։
Առաջին օգնություն
1. Պառկեցրեք տուժածին։
2. Հարվածի տեղում դրեք սառը թրջոցներ։
Զանգահարեք շտապօգնություն կամ խնդրեք որեւէ մեկին զանգահարել, եթե տուժածի մոտ նկատում եք վերը թվարկված ախտանշաններից նույնիսկ մեկը, օրինակ՝ եթե նա փսխում է։
Գլխուղեղի ցնցում ստացածը նույնիսկ լավ ինքնազգացողության դեպքում պետք է գտնվի բժշկական հսկողության տակ։
Չի կարելի տուժածին թողնել տանը։
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ»
05.07.2017
