«Չեմ ճանաչում, թե Վարդգես Գասպարին ով է եւ չեմ էլ ուզում ճանաչել: Ինձ չի հետաքրքրում, թե նա ինչ ակցիաներ է իրականացնում, որովհետեւ նա չի կարող որեւէ ձեւով խոչընդոտել իմ մասնագիտական գործունեությանը»,-«Սեֆիլյանի եւ մյուսների» գործով դատական նիստի ավարտին այսօր լրագրողների հետ զրույցում անդրադառնալով քաղաքացիական ակտիվիստ Վարդգես Գասպարիի՝ իր դեմ բողոքի ակցիաներին, ասաց Ժիրայր Սեֆիլյանի համար հանրային պաշտպան ներգրավված փաստաբան Մարինե Թովմասյանը: Նա նշեց՝ իր համար անհասկանալի է, թե քաղաքացիական ակտիվիստն ինչ առնչություն ունի դատավարության հետ:
Ապա բացատրեց, թե ինչու է մասնակցում նիստին այն դեպքում, երբ Ժիրայր Սեֆիլյանը հրաժարվել է իր մասնագիտական ծառայություններից: «Քրեական դատավարությունը սահմանում է՝ եթե անձը չի ապահովում իր պաշտպանին այն դեպքում, երբ ինքը հեռացված է նիստերի դահլիճից սանկցիայի պատճառով, պաշտպանի մասնակցությունը պարտադիր է դառնում: Այսինքն, մինչեւ Սեֆիլյանը չներկայանա դատարան, իմ լիազորություններն օրենքի ուժով չեն կարող դադարեցվել: Ես մասնակցում եմ նիստի, որովհետեւ Սեֆիլյանը եւ Ներսես Պողոսյանը հեռացված են նիստերի դահլիճից: Երբ նրանք բերվեն դատարան եւ շարունակեն անգամ առանց իրենց ցանկությամբ ընտրված պաշտպանի իրականացնել իրենց պաշտպանությունը, իմ լիազորությունները կդադարեցվեն օրենքի ուժով: Այս դեպքում պաշտպանի պարտադիր մասնակցությունը վերանում է»,-պարզաբանեց Մարինե Թովմասյանը:
Այնուհետեւ Ժիրայր Սեֆիլյանի համակիրները պաստառներով կանգնեցին Մարինե Թովմասյանի հետեւում: Փաստաբանը լրագրողին ասաց, որ հարցազրույցը կշարունակի միայն այն դեպքում, երբ քաղաքացիները հեռացվեն: Լրագրողն էլ ասաց, որ ինքը ոստիկան չէ, որ նման պահանջ կատարի: Մարինե Թովմասյանը հեռացավ: Ակտիվիստները պաստառների վրա գրել էին, որ հղի կնոջը հարիր չէ ծառայել իշխանություններին (Մարինե Թովմասյանը երեխայի է սպասում.-խմբ.):
Լուիզա ՍՈՒՔԻԱՍՅԱՆ
