Այսօր լրագրողների հետ զրույցում ՊՆ փոխնախարար Արտակ Զաքարյանը խոսեց ռազմարդյունաբերական համալիրի զարգացման հարցում Սփյուռքի անելիքների մասին: Նա ասաց, որ Սփյուռքի մեր հայրենակիցները արդեն արել են տարբեր տիպի գործնական առաջարկություններ. «Ներգրավված լինելով տարբեր շուկաներում եւ տարբեր խնդիրներում՝ իրենց մասնագիտական և գիտական ներուժը կարող են ներդնել, հատկապես բարձր տեխնոլոգիաների լայն կիրառումը ռազմարդյունաբերության մեջ գիտեք, որ մեծ դեր ունի: Իսկ սփյուռքահայությունն իր տեղն ունի ռազմական արդյունաբերության համար կիրառվող բարձր տեխնոլոգիական ուղղություններում: Այստեղ անհրաժեշտ է Սփյուռքի համար ապահովել ճիշտ ծրագրային մոտեցում: Միայն ֆինանսական ներդրումները կամ բիզնես մոտեցումը չի, որ կարող են էֆեկտիվ լինել, մասնագիտական ներգրավվածությունը շատ կարեւոր է»:
ՊՆ փոխնախարարը նշեց, որ սփյուռքահայերի համար շատ կարեւոր է արդարությունը, արդյունավետ կառավարումը եւ լիարժեք ներգրավումը եւ պատրաստ են լսել բոլոր այն խնդիրները, որոնք կապված են բանակի, զինված ուժերի հետ:
Նա ասաց, որ պետք է վերականգնել վստահությունը բանակի նկատմամբ: Ու լիարժեք վստահության պայմաններում արդեն կկարողանան խոսել Սփյուռքի, սփյուռքահայերի ներգրավվածության մասին նաեւ զինծառայությունում. «Պարտադիր չի դա լինի ժամկետային ծառայություն, կարող է լինել այլ ծառայության տեսակ, որը ունենք»:
Փոխնախարարն ասաց, որ արդեն բանակի հետ պիլոտային ծրագիր է իրականացվում՝ նաեւ սփյուռքահայ երիտասարդներին ներգրավելու զինծառայության խնդիրներում:
Հռիփսիմե ՋԵԲԵՋՅԱՆ
