«Սասնա ծռերի» գործով դատական նիստում այսօր միջադեպ տեղի ունեցավ ամբաստանյալների պաշտպանների եւ դատավորի, ապա՝ նիստերի դահլիճի ապակե պատնեշից այս կողմ գտնվող քաղաքացիների եւ դատական կարգադրիչների միջեւ:
Նախ, ամբաստանյալների պաշտպաններից փաստաբան Արայիկ Պապիկյանը հայտարարեց, որ «Սասնա ծռերին» առաջադրված մեղադրանքներն ընդհանրական են, ինչի առնչությամբ մեղադրող-դատախազները պետք է պարզաբանում ներկայացնեն:
Դատախազներից Արթուր Չախոյանը նոր էր սկսել կարծիք արտահայտել, երբ ամբաստանյալների պաշտպաններից Լուսինե Սահակյանն ընդհատեց նրան՝ ասելով, որ առարկում է դատավոր Արթուր Օհանյանի գործողությունների դեմ:
Վերջինս էլ ընդգծեց, որ դատախազը խոսում էր եւ չի կարելի ընդհատել, սակայն Լուսինե Սահակյանը շարունակեց իր պնդումը: Դատավորը բարձր տոնով սաստեց նրան, ինչին ի պատասխան Լուսինե Սահակյանը բղավեց. «Մի՜ գոռացեք իմ վրա, ձեր ձայնն իջեցրե՜ք…դուք ցանկանում եք ձգձգել նիստը: Եթե չարգելեիք արտահայտվել, հիմա արդեն ասել էի: Ես իրավունք ունեմ առարկելու ձեր գործողությունների դեմ, դուք չեք կարող արգելել»:
Դատավոր Արթուր Օհանյանը պատասխանեց. «Մի՜ օգտվեք այն փաստից, որ կին եք, ու ձեզ բան չենք ասում»:
Սա վրդովվեցրեց փաստաբան Երվանդ Վարոսյանին, որն էլ իր հերթին բղավեց. «Առարկություն ներկայացնելու իրավունք ունեն բոլորը՝ անկախ սեռից»:
Տեւական ժամանակ նիստերի դահլիճում դատավորի եւ փաստաբանների բղավոցներն ու փոխադարձ մեղադրանքները չէին դադարում:
Ամբաստանյալներից Մարտիրոս Հակոբյանի՝ «Դեդ»-ի համբերությունը սպառվեց: Նա առանց դատավորի թույլտվության՝ վեր կացավ ու ցանկացավ հեռանալ, ինչը կանխեցին ոստիկանները: Արդյունքում «Դեդ»-ը մի պահ փոքր-ինչ հրմշտոցի մեջ հայտնվեց:
Կատարվածից վրդովվեցին նիստերի դահլիճի ապակե պատնեշից այս կողմ գտնվող քաղաքացիները եւ իրենց հերթին լեզվակռվի մեջ մտան դատական կարգադրիչների հետ:
Լարված մթնոլորտը հանդարտեցնելու համար դատավորն ընդմիջում հայտարարեց:
Լուիզա ՍՈՒՔԻԱՍՅԱՆ
