Քիչ առաջ ՀՀԿ ԳՄ նիստից բարկացած դուրս եկավ ՀՀԿ անդամ, Ֆուտբոլի ֆեդերացիայի նախկին նախագահ Ռուբեն Հայրապետյանը:
Լրագրողների հարցերին նա հրաժարվեց պատասխանել:
Այս միջադեպից հետո նիստից դուրս եկավ ՀՀԿ խոսնակ Էդուարդ Շարմազանովը:
Նա ասաց, թե նիստից դուրս է եկել, քանի որ իրեն տեղեկացրել են, որ լրագրողները ՀՀԿ շենքի մոտ` դրսում սպասում են, մրսում են:
Նա լրագրողներին ներս հրավիրեց և հորդորեց սպասել՝ չնշելով ինչքան ժամանակ: Միայն տեղեկացրեց, որ նիստի ավարտից հետո ՀՀԿ անդամ Վիգեն Սարգսյանը մամուլի ասուլիս կտա: Նա էլ, ամենայն հավանականությամբ, կգլխավորի ՀՀԿ ցուցակը:
Էդուարդ Շարմազանովը Ռուբեն Հայրապետյանի՝ բարկացած հեռանալու մասին հարցին ի պատասխան ասաց. «Երկու հարյուր հոգուց ավելի մարդ է դահլիճում. չգիտեմ՝ ով, ինչ պատճառով է դուրս գալիս, հետ գալիս»:
Էդուարդ Շարմազանովը փոխանցեց, որ այսօր ցուցակ չեն հրապարակելու, հենց հիմա շատ կարևոր հարց է քննարկում՝ մասնավորապես մասնակցե՞լ, թե ոչ արտահերթ խորհրդարանական ընտրություններին: Այսօր որոշում է ընդունվելու: Նիստից հետո ՀՀԿ-ն կտարածի մամուլի հաղորդագրություն:
Էդուարդ Շարմազանովը ևս մեկ անգամ լրագրողներին ներողություն խնդրեց նրանց մրսացնելու համար և կես կատակ կես լուրջ ասաց՝ հիմա որ ասեմ բոլորիդ սիրում եմ, կասեք Նիկոլ Փաշինյանի խոսքն է:
Տաթև ՀԱՐՈՒԹՅՈՒՆՅԱՆ
