Ադրբեջանի նախագահ Իլհամ Ալիևն ընդունել է Ռուսաստանի Զինված ուժերի գլխավոր շտաբի պետ, պաշտպանության առաջին փոխնախարար Վալերի Գերասիմովի գլխավորած պատվիրակությանը: Այս մասին ասվում է Ադրբեջանի նախագահի գրասենյակի տարածած հաղորդագրության մեջ:
Հաղորդագրության մեջ նշվում է, որ ռուս-ադրբեջանական հարաբերությունները բարեհաջող և դինամիկ զարգանում են բոլոր ոլորտներում, այդ թվում՝ ռազմական:
«Մատնանշելով երկկողմ հարաբերությունների շատ բարեհաջող և դինամիկ զարգացումը բոլոր ոլորտներում, այդ թվում ռազմական՝ նախագահ Իլհամ Ալիևն ընդգծել է, որ բարձր մակարդակով անցկացվող հանդիպումները կարևոր դեր են խաղում համագործակցության զարգացման գործում»,- ասվում է հաղորդագրության մեջ:
Ալիևը հիշեցրել է, որ միայն 2018թ. բազմաթիվ հանդիպումներ են տեղի ունեցել երկու պետությունների ղեկավարների միջև, ստորագրվել են մեծ թվով համաձայնագրեր:
«Նախագահ Ալիևն ընդգծել է, որ Ադրբեջանի և Ռուսաստանի միջև բարեկամական հարաբերությունները գոյատևել են պատմության փորձությունների միջով, և երկու երկրներն այսօր հուսալի գործընկերներ են»,- ասվում է հաղորդագրության մեջ: Նա նաև ընդգծել է, որ երկու երկրների ռազմական և ռազմատեխնիկական համագործակցությունը «բարձր մակարդակի է հասել»:
Ադրբեջանի նախագահը շնորհակալություն է հայտնել, որ Բաքուն է ընտրվել Ռուսաստանի և ՆԱՏՕ-ի ռազմական ղեկավարության միջև հանդիպման համար՝ նկատելով, որ դա իր երկրի նկատմամբ «հարգանքի և վստահության ցուցիչ է»:
Իր հերթին Գերասիմովը հիշեցրել է, որ արդեն մի քանի անգամ Բաքվում հանդիպել է ՆԱՏՕ-ի և ԱՄՆ-ի ղեկավարության հետ: Նրա խոսքով՝ Ադրբեջանի մայրաքաղաքը «շատ հարմար վայր է դրա համար, և այստեղ պայմաններ են ստեղծվում նման հանդիպումների համար»:
Պատրաստեց՝ Վիկտորյա ԱՆԴՐԵԱՍՅԱՆԸ
Ռուս -թուրքական և Ռուս-ադրբեջանական պատմական բարեկամության հերթական դրսևորում, այս անգամ կրկին ուղղված Հայաստանի շահերի դեմ: Կարծեք թե ռուսն ու թուրքը մեկ մոր արգանդից են դուրս եկել և միասին կնքվել են հայ ժողովուրդի արյան մեջ: Սակայն, Արցախի չքառօրյա պատերազմը (սրտանց ցավում եմ մեր տված երիտասարդ զոհերի համար) և Հայստանում տեղի ունեցած թավշյա հեղափոխությունը բարեբախտաբար մեզ ցույց տվեց, որ այլևս պատրաստ չենք խաբվել Ռուսաստանի կեղծ ու երկերսանի բարեկամական խոստումներին և այժմ մենք պատրաստ ենք դիմակայել բոլոր մարտահրավերները առանց նրանց օգնության ձեռք մեկնելու: Հենց լավ է որ ռուսն ու թուրքը և ադրբեջանցին միմյանց հետ շարունակեն հանդիպել ու «հարգանքի և վստահության ցուցիչ» -ներով առաջնորդվել դեպի միասնական կործանում:
Ամբողջական հոդվածը կարող եք կարդալ այս հասցեով՝ https://www.aravot.am/2018/12/12/1000579/
© 1998 – 2018 Առավոտ – Լուրեր Հայաստանից