Ինչպես ավելի վաղ հայտնել էինք, ԱԺ պետաիրավական հարցերի մշտական հանձնաժողովում այսօր պատգամավորները քննարկում են «Լուսավոր Հայաստան» խմբակցության այն օրինագիծը, որը սահմանում է՝ լիազորությունների կասեցման դեպքում (երբ անձի հանդեպ քրեական հետապնդում է իրականացվում) քրեակատարողական ծառայողները շարունակում են աշխատավարձ ստանալ, ինչպես դատավորները, դատախազները կամ քննիչները: Կառավարության տեսակետն այս օրինագծի վերաբերյալ դրական չէր: Արդարադատության փոխնախարար Տիգրան Խաչիկյանը հայտարարեց, որ օրինագիծն այս տեսքով ընդունելի չէ, իսկ գաղափարը պատրաստ են այլ օրենսդրական կարգավորման շրջանակում քննարկել. «Այս տեսքով ընդունումը համարում ենք ոչ նպատակահարմար»:
ԲՀԿ պատգամավոր Գեւորգ Պետրոսյանին կառավարության պաշտոնյայի մոտեցումը դուր չեկավ. «Խնդիրն, իսկապես, կա: Պարոն Խաչիկյան, մեզ պետք է կառուցողական աշխատանք: Կապ չունի, թե որ պատգամավորն է օրինագիծ մշակել: Մարդն աշխատել է, չարչարվել, իսկ կառավարությունն ասում է՝ այս վիճակո՜վ, ու գաղափարը մի քանի ամսով, կներեք, տշում առաջ…Եկեք իրար օգնենք, եղբայր ջան, չենք եկել այստեղ իրար պիտակավորելու»:
Գեւորգ Պետրոսյանն այնուհետեւ վրդովված դիմեց փոխնախարարին. «Իսկ ո՞վ է ասել, որ կառավարության բոլոր օրինագծերն աստվածաշնչյան՝ բյուրեղյա վիճակում են, որ մենք էլ հալած յուղի տեղ ընդունենք: Եթե այս ձեւաչափով մոտենանք հարցին…իսկ ո՞վ է ասել, որ Տարոն Սիմոնյանի այս օրինագիծը բացարձակ ճշմարտություն է: Բացարձակ ճշմարտությունն այն է, որ բացարձակ ճշմարտություն գոյություն չունի: Բայց եկեք իրար հանդեպ կառուցողական լինենք: Հարցը ոչ թե այս օրինագիծն է, այլ երեւույթն առհասարակ: Գոնե երկու օգտակար բառ ասինք նախագծի համար, ոչ թե՝ այս վիճակում ընդունելի չէ»:
Արդարադատության փոխնախարար Տիգրան Խաչիկյանն արձագանքեց. «Ռոմանտիկ երանգ տվեցիք այն բանին, ինչը բացառապես իրավական տիրույթում էր: Նաեւ պատկերավոր երանգ հաղորդեցիք, ինչի անհրաժեշտությունը չկար: Ես վերահաստատել եմ կառավարության պատրաստակամությունը՝ օրինագծի գաղափարի կյանքի կոչելն ապահովելու նպատակով»:
Կարդացեք նաև
Օրինագծի հեղինակ, ԼՀԿ պատգամավոր Տարոն Սիմոնյանը կատակեց. «Լավ, որպեսզի շատ բան չլինի, եկեք ես հետ վերցնեմ օրինագիծը, թե չէ, պարոն Խաչիկյան, ասում եք՝ կողմ եք, բայց դեմ եք…»:
Հիշեցնենք, որ օրինագծի քննարկումը հետաձգվել է երկու ամսով՝ լրամշակման նպատակով:
Լուիզա ՍՈՒՔԻԱՍՅԱՆ
