Ռազմական ոստիկանությունն այսօր Եռաբլուր զինվորական պանթեոնում վերակարգ է նշանակել, որպեսզի տարածքում վերահսկողություն իրականացնեն: Այս մասին Aravot.am-ի հետ զրույցում ասաց ՀՀ պաշտպանության նախարարի մամուլի քարտուղար Արծրուն Հովհաննիսյանը: Նրա խոսքով. «Այդ գործով զբաղվում են, բայց դեռեւս որեւէ բան հայտնի չէ: Կան որոշակի վարկածներ»:
Հիշեցնենք, որ այսօր Ֆեյսբուքյան օգտատերերից մեկը Եռաբլուրից տեսանյութ էր տարածել, որտեղ երեւում էին ապրիլյան պատերազմի հերոսների պղծված շիրմաքարերը՝ սեւ ներկ հիշեցնող նյութի հետքերով:
Կարդացեք նաև
Երեկ ՖԲ սոցիալական ցանցում տարածվել էր մի տեսանյութ, որտեղ երևում է, թե ինչպես են ներքին թուրքերը պղծել Ապրիլյան պատերազմում զոհված զինվորականների շիրիմաքարերը …Պատկան մարմիններից բացատրություն եմ պահանջում «Եռաբլուր» պանթեոնի պահպանության և այդ ստորների հայտնաբերման ուղղությամբ ձեռնարկված գործողությունների վերաբերյալ։
Gepostet von Արթուր Եղիազարյան am Donnerstag, 1. August 2019
Լուրը լսելուն պես Եռաբլուր-պանթեոն են շտապել զոհված տղաների հարազատները, այլ քաղաքացիներ, որոնք սկսել են մաքրել գերեզմանաքարերը:
«Չեմ կարողանում հասկանալ՝ ով է արել, ինչի համար է արել: Ես մինչեւ գնացի, որդուս շիրմաքարն արդեն մաքրել էին: Մտածում էինք սեւ ներկ է, բայց հետո պարզվեց, որ սեւ հալեցրած մոմ է: Ոչ մի բացատրություն չունեմ կատարվածին»,- Aravot.am-ի հետ զրույցում ասաց ապրիլյան քառօրյա պատերազմում զոհված Արմենակ Ուրֆանյանի մայրը՝ Համեստ Ներսիսյանը:
Նրա խոսքով՝ իրավապահները պետք է հետեւողական լինեն, որպեսզի հանցագործները հայտնաբերվեն եւ պատժվեն: Տիկին Ներսիսյանի խոսքով, սա արդեն որերորդ ոտնձգությունն է Եռաբլուր-պանթեոնի նկատմամբ: Նա հիշեցրեց այս տարվա ապրիլի 2-ի դեպքը, երբ Եռաբլուր եկած ավտոմեքենայի ապակիներն էին կոտրել, գողություն արել. «Սկզբում մտածում էի, որ հնարավոր է երեխաների ձեռքի գործը լինի, բայց հետո մտածեցի՝ ինչո՞ւ պետք է այդպիսի բան անեն: Չէ՞ որ դպրոցներում նրանց այդքան կրթում են, ասում, որ Եռաբլուրը սրբավայր է: Չգիտեմ տարբեր վարկածներ են ասում, բայց հստակ ոչինչ չեմ կարող ասել»:
Տիկին Ներսիսյանի խոսքով, այս ամենից մնաց այն, որ երկրորդ անգամ ծնողներին ցավ պատճառեցին: Տիկին Համեստի համար այդպես էլ մութ է մնում, թե ինչո՞ւ հենց ապրիլյանի զոհերի նկատմամբ է դա կատարվել, բայց նաեւ լսել է, որ այլ գերեզմանատներից էլ տեղեկություններ են ստացվել,որ կրկին շիրմաքարեր են պղծվել՝ նույն եղանակով:
Aravot.am–ի տեսախցիկը ֆիքսեց, որ այս պահի դրությամբ զոհված զինվորների շիրմաքարերն արդեն մաքրված են:
Լուսանկարները՝ շուտով:
Ինչպես ՀՅԴ երիտասարդների միությունից են հայտնել, այսօր ժամը 20-ին, դաշնակցական երիտասարդները Եռաբլուրում կկազմակերպեն մոմավառություն: Երիտասարդները նաեւ պատրաստակամություն են հայտնել շուրջօրյա հերթապահություն իրականացնել պանթեոնի տարածքում:
Լուսինե ԲՈՒԴԱՂՅԱՆ
