Դավիթ Պետրոսյանն ու Էդուարդ Համբարձումյանը դուրս են գալիս ԵՊԲՀ հոգաբարձուների խորհրդի կազմից, ինչի վերաբերյալ նրանք նամակ են ուղարկել Կրթության, գիտության, մշակույթի եւ սպորտի նախարար Արայիկ Հարությունյանին:
Aravot.am-ը ԵՊԲՀ հոգաբարձուների խորհրդի նախագահ Վահան Արծրունուն խնդրեց մեկնաբանել խորհրդի երկու անդամների այս քայլը եւ նամակը: «Նամակը չեմ կարող մեկնաբանել, որովհետեւ այն ինձ չի հասել հոգաբարձուների խորհրդի խողովակներով, մինչդեռ կարգը պահանջում է դիմել հոգաբարձուների խորհրդի քարտուղարին, եւ քարտուղարը փոխանցում է ինձ եւ մնացած անդամներին: Այստեղ խախտված է կարգը»,-ասաց Վահան Արծրունին:
«Այդ նամակը բաց նամակ չէ, այն ուղղվել է նախարարին, դրանից հետո հրապարակվել է: Որպես հոգաբարձուների խորհրդի նախագահ՝ պետք է իմ վերաբերմունքը դրսեւորեմ հրապարակային հրապարակման հիման վրա, ինչը երկու անձանց կողմից տարվում է: Նրանց հրապարակային կոչերին, վիդեո-զեղումներին, հայտարարություններին եւ հոդվածներին ես հարկ չեմ համարում անդրադառնալ, որովհետեւ նման խնդիրներ բարձրացնելու եւ համապատասխան վերաբերմունք դրսեւորելու համար ունենք հարթակ, որը հոգաբարձուների խորհրդի հարթակն է, որից նրանք խուսափում են: Երեք նիստ է եղել, մեկն՝ առցանց, եւ երեք նիստերի ընթացքում նրանք հնարավորություն ունեցել են բարձրաձայնելու մատնանշած խնդիրները, սակայն երբեւիցե չեն արել:
Երկրորդ պատճառը, որ չեմ կարող նամակը մեկնաբանել այն է, որ իրենց այդ հրապարակումը պարունակում է իմ մասին սուտ տեղեկություններ, այնտեղ կա ակնարկ, որը վիրավորում է իմ արժանապատվությունն ու պատիվը՝ երկու քրեորեն հետապնդելի գործառույթ: Ես հետամուտ կլինեմ այս հարցին, երբ քննարկման հարթակը ոչ թե հանրային լինի, այլ ադմինիստրատիվ: Այս խնդիրը մենք, բնականաբար, կքննարկենք մնացած անդամների հետ, որովհետեւ անթույլատրելի վարք են դրսեւորում այդ երկու անդամները»:
Կարդացեք նաև
Վահան Արծրունին հավելեց. «Միայն առաջ են քաշվում անհեթեթ թեզեր՝ առանց որեւէ փաստարկների, եւ այդ անհեթեթ թեզերից նախարարը պետք է իր եզրահանգումներն անի այդ նամակը ստորագրող հոգաբարձուների անդամների կարծիքով: Ես,իհարկե, կուզեի ավելի պատճառաբանված եւ ավելի հիմնավոր փաստարկների վրա հիմնված փաստաթղթի հետ գործ ունենայի, բայց այն նյութը, որ հրապարակվել է եւ համացանցում է, ինձ մոտ չի կարող լուրջ վերաբերմունք առաջացնել: Այսինքն այս երկու ընկերները պարզապես մարգինալիզացնում են իրենց դերակատարությունը եւ խորհրդի մեջ, եւ հասարակական կյանքում՝ անհիմն կերպով որերորդ անգամ լարելով հանրային կարծիքը բժշկական համալսարանի շուրջ: Սա դատապարտելի է, եւ խնդիրը հասել է նրան, որ վերին ատյաններում պետք է քննարկվի: Նման վարքը անթույլատրելի է, մանավանդ հոգաբարձուների խորհրդի անդամների համար»:
Գոհար ՀԱԿՈԲՅԱՆ
