Այսօր ԱԺ-կառավարություն հարցուպատասխանի ժամանակ ԲՀԿ պատգամավոր Վահե Էնֆիաջյանը բուհական ծրագրերում հայոց լեզու, հայոց պատմություն, հայ գրականություն առարկաները ոչ պարտադիր դարձնելու մասին որոշման հետ կապված հարց ուղղեց ԿԳՄՍ նախարար Արայիկ Հարությունյանին:
Նախարարը պատասխանեց. «Կարիք չկա հայոց լեզուն, հայոց պատմությունը եւ հայ գրականությունը ինձանից եւ մեր թիմից պաշտպանել, որովհետեւ հայերենի շահերը ես տարիներ շարունակ պաշտպանել եմ: 2010-ին ես եղել եմ «Մենք դեմ ենք օտարալեզու դպրոցների բացմանը Հայաստանում» նախաձեռնության անդամ, վերաբերմունքս հայերենի դասավանդման հետ կապված, հայերենի դասավանդման ծավալների հետ կապված այնտեղ եմ ասել»:
Արայիկ Հարությունյանը Լյուվենի համալսարանի ռեկտորի հետ իր զրույցից պատմեց՝ ասելով, որ այնտեղ էլ մագիստրատուրայից ու ասպիրանտուրայից պատկերը փոխվում է ֆլոմաներենի հարցում, չնայած ազգապահպանման խնդիրը սուր է դրված:
Նախարարը վստահեցրեց, որ մտահոգվելու որեւէ խնդիր չկա:
Կարդացեք նաև
Էնֆիաջյանը Թումանյանից մեջբերում արեց. «Լեզուն է ամեն մի ժողովրդի ազգային գոյության եւ էության ամենախոշոր փաստը»:
Արայիկ Հարությունյանն արձագանքեց, որ անգիր անել չի սիրում եւ մեջբերում չի կարող անգիր արած ասել, բայց հայերենի հետ կապված մի շարք գծագրեր են իրականացնում, հայագիտական առարկաների զարգացման նոր հայեցակարգ են մշակում:
Նա ասաց, որ այն քաղաքականությունը, որ իրենք են վարում, թույլ է տալու, լիովին տիրապետեն հայերենին:
Հռիփսիմե ՋԵԲԵՋՅԱՆ
