Մարտի 14-ից 24-ը Լոնդոնում կայանալիք օլիմպիական վարկանիշային մրցաշար մեկնելուց առաջ բռնցքամարտի Հայաստանի ազգային հավաքականի անդամներից մի քանիսը լրագրողների հետ զրույցում խոսեցին իրենց մարզավիճակի եւ տրամադրվածության մասին:
Արման Դարչինյանի ինքնազգացողությունը լավ է եւ նա տրամադրված է մարտականորեն: «Անձնական քաշիս հետ կապված խնդիրները կարգավորվել են եւ մարզիչներիս գնահատմամբ լավ մարզավիճակում եմ: Շատ բան կախված է լինելու, ինչպես գլխավոր մարզիչը քիչ առաջ ասաց, վիճակահանությունից եւ մրցավարության արդարությունից»: Դարչինյանը այս ընթացքում հասցրել է նաեւ պրոֆեսիոնալ բռնցքամարտի մասնակցել, ինչը նրա համոզմամբ իրեն օգնելու է:
Գոռ Ներսեսյանը հավաքականի հետ ուսումնամարզական չորս հավաք է անցկացրել եւ պատրաստ է Լոնդոնում օլիմպիական վարկանիշ նվաճել: «Ամբողջ թիմն է լավ պատրաստվել: Մենք գնում ենք ոչ միայն ուղեգիր նվաճելու, այլեւ մեր քաշային կարգերում հաղթելու համար»,-ասաց նա:
Կարդացեք նաև
Կանանց հավաքականի անդամ Անի Հովսեփյանը, թեեւ վատառողջության պատճառով այսօր բաց մարզմանը չմասնակցեց, սակայն նույնպես լավ մարզավիճակում է: Սա հավաքականի կազմում նրա առաջին մասնակցությունն է օլիմպիական վարկանիշային մրցաշարի, սակայն վստահ է, որ արդարացնելու է մարզիչների վստահությունը:
Աշոտ ՀԱԿՈԲՅԱՆ
