Այսօր առողջապահության նախարար Արսեն Թորոսյանը տեղեկացրել էր, որ այս պահին ունենք կորոնավիրուսի հաստատված 23 դեպք եւ բոլոր նոր դրական դեպքերը կապված են «Էջմիածնի» դեպքի հետ և ի սկզբանե մեկուսացված են եղել: Սակայն Քաղաքացիական ավիացիայի կոմիտեն հաղորդագրություն էր տարածել, որ «Հայաէրոնավիգացիա» ՓԲ ընկերությունում գրանցվել է մեկ հաստատված կորոնովիրուսի դեպք, ինչի պատճառով ոլորտի ղեկավարության եւ առողջապահության նախարարության հետ համատեղ համագործակցության արդյունքում կայացվել է համապատասխան որոշում մեկուսացնել ընկերության անձնակազմը ընկերության մասնաշենքում, որը գտնվում է «Զվարթնոց» օդանավակայանի պահպանվող տարածքում:
Այս առնչությամբ հարցադրումներ են հնչում՝ սա արդեն 24-րդ դե՞պքն է ու ինչո՞ւ Արսեն Թորոսյանը մատնանշեց միայն Էջմիածնի դեպքերը: Այս առնչությամբ Aravot.am-ը պարզաբանում խնդրեց առողջապահության նախարարության հասարակայնության հետ կապերի եւ տեղեկատվության վարչությունից: Մեզ պատասխանեցին, որ այդ կինը, որն աշխատել է «Հայաէրոնավիգացիա» ՓԲ ընկերությունում, նույնպես էջմիածնից է, դրա համար է նախարարն ասել, որ նույն շրջանակից է: Իսկ մինչեւ մեկուսանալը նա աշխատանքի է գնացել, ուստի հիմա մեկուսացրել են ընկերության ամբողջ անձնակազմին:
Նաեւ լուրեր են շրջանառվում, որ իրականում օդանավակայանի դիսպետչերներից վարակակիրներ կան, թաքցնում են: Նախարարությունից վստահեցրին, որ պաշտոնապես ինչ հայտարարում են, միայն այդ դեպքերն են հաստատված, ոչ մի տվյալ չի թաքցվում:
Հռիփսիմե ՋԵԲԵՋՅԱՆ
