«Ժողովրդավարական ընտրությունների եվրոպական պլատֆորմը» (EPDE) հրապարակել է զեկույց` 2020թ. փետրվարի 9-ին Ադրբեջանում տեղի ունեցած խորհրդարանական ընտրությունների վերաբերյալ: Զեկույցի հեղինակ Անտոն Շեխովցովը փաստում է, որ արևմտյան փորձագետները Ադրբեջանի նախագահ Իլհամ Ալիևի ռեժիմը համարում են ավտորիտար, չնայած դրան պաշտոնական Բաքուն պարբերաբար հրավիրում է միջազգային դիտորդների` խորհրդարանական և նախագահական ընտրությունների մոնիթորինգի համար: Այն դեպքում, երբ այնպիսի կազմակերպություններ, ինչպիսիք են ԵԱՀԿ/ԺՀՄԻԳ ը և ԵԱՀԿ Խորհրդարանական Վեհաժողովը քննադատում են Ադրբեջանում կայացած ընտրությունները` քաղաքական իրական մրցակցության բացակայության, իրավունքների և ազատության սահմանափակումների համար, Ալիևի ռեժիմին հաջողվում է գտնել արևմտյան այնպիսի դիտորդների, որոնք պատրաստ են գովաբանել Ադրբեջանը` իբրև թե ազատ, արդար և ժողովրդավարական ընտրությունների համար:
Զեկույցը փաստում է, որ Ընտրությունների Միջազգային Դիտորդական Առաքելությունը (ԵԽԽՎ )փետրվարի 9-ին Ադրբեջանում տեղի ունեցած ընտրությունները որակել է ոչ մրցակցային` օրենսդրական և քաղաքական մի շարք սահմանափակումների պատճառով: Այնուամենայնիվ, միջազգային մյուս կազմակերպությունների ճնշող մասը և առանձին դիտորդներ համարում են, որ Ադրբեջանն անցկացրել է ժողովրդավարական , միջազգային չափանիշներին համապատասխան ընտրություններ:
Զեկույցի հեղինակը շեշտում է, որ փաստերը վկայում են այն մասին, որ Ադրբեջանը միտումնավոր ընտրել է միջազգային դիտորդական այնպիսի առաքելություններ, որոնք արդյունքում դրական էին գնահատելու ընտրությունները: Ուշագրավ է, որ եվրոպացի բոլոր դիտորդները, որոնք ներկայացրել են Ադրբեջանի հետ միջխորհդարանական խմբավորումները, բարձր են գնահատել տեղի ունեցած ընտրությունները: Նման գնահատական են տվել նաև Ադրբեջանի խորհրդարանի կողմից հրավիրված եվրոպացի դիտորդները` քաղաքական գործիչներ, գիտնականներ, լրագրողներ, հասարակական գործիչներ:
Զեկույցի համաձայն` ընտրությունների դիտորդական առաքելության համակարգողը, որի կազմակերպիչը եղել է Ժողովրդավարության եվրոպական խորհուրդը և որը բաղկացած է եղել 18 եվրոպացի քաղաքական գործիչներից և փորձագետներից, եղել է լեհ աջակողմյան քաղաքական գործիչ, որն ունի ռուս քաղաքական գործիչներին միջազգային դիտորդական կանխակալ առաքելություն տրամադրելու համբավ:
Կարդացեք նաև
Նշվում է նաև, որ ադրբեջանական ԶԼՄ-ները միտումնավոր խեղաթյուրել են եվրոպացի անկախ դիտորդների քննադատական հայտարարությունները: Ընտրությունների Միջազգային Դիտորդական Առաքելության նախնական արդյունքների հրապարակումից հետո ադրբեջանական լրատվամիջոցները փորձել են քողարկել և վարկաբեկել այդ գնահատականները` միջազգային լոյալ դիտորդների, ռուս պաշտոնյաների և քաղաքական գործիչների օգնությամբ` ասվում է զեկույցում:
Պատրաստեց՝ Վիկտորյա ԱՆԴՐԵԱՍՅԱՆԸ
