Ինչպես տեղեկացրել ենք, նախորդ օրը Գյումրու «Մուշ» թաղամասում թափառող վեց-յոթ շներ հարձակվել են երկուս ու կես տարեկան երեխայի վրա՝ նրան բազմաթիվ վնասվածքներ պատճառելով։
Նրան սկզբում բժշկական օգնություն էին ցուցաբերել «Գյումրու Մոր ու մանկան ավստրիական հիվանդանոցում», որտեղից էլ տեղափոխել էին մայրաքաղաք։
Ինչպես Aravot.am-ին տեղեկացրել էր «Գյումրու Մոր ու մանկան ավստրիական հիվանդանոց»-ի տնօրեն Ժորժիկ Սերոբյանը, իրենք առաջին անհրաժեշտ բուժօգնությունն են ցուցաբերել, բայց քանի որ երեխան պարանոցի շրջանում կծած վերքեր ուներ ու նեղ մասնագիտական օգնության կարիք կար, նրան տեղափոխել են մայրաքաղաք՝ «Սուրբ Աստվածամայր» բժշկական կենտրոն։
«Սուրբ Աստվածամայր» բժշկական կենտրոնի մամլո քարտուղար Գևորգ Դերձյանը քիչ առաջ իր ֆեյսբուքյան էջում տեղեկացրել է, որ երեխայի վիճակը բժիշկները գնահատում են ծանր, բայց կայուն:
Կարդացեք նաև
«Գյումրիում մի խումբ թափառող շներ հարձակվել են 2.5 տարեկան երեխայի վրա՝ նրան բազմաթիվ վնասվածքներ պատճառել։ Երեխային բազմակի կծած վերքերով տեղափոխել են «Գյումրու Մոր ու մանկան ավստրիական հիվանդանոց», որտեղ վիրահատվել է, այնուհետև շտապ տեղափոխվել Երևան՝ «Սուրբ Աստվածամայր» ԲԿ։
Այստեղ երեխան երկրորդ անգամ է վիրահատվել, ունի բազմաթիվ վնասվածքներ՝ դեմքի, վերջույթների և մարմնի այլ հատվածներում: Գտնվում է վերակենդանացման բաժանմունքում:
Բժիշկները վիճակը գնահատում են ծանր, բայց կայուն», -գրել է Գևորգ Դերձյանը:
Նունե ԱՐԵՎՇԱՏՅԱՆ
