Հայաստանի պետական տնտեսագիտական համալսարանի խորհրդի անդամ, տնտեսագիտության թեկնածու Համլետ Թադեւոսյանը պատասխանում է Aravot.am-ի հարցերին:
– Ինչպե՞ս եք գնահատում ՀՊՏՀ-ում ստեղծված իրավիճակը, որի վերաբերյալ հայտարարությամբ հանդես եկավ նաեւ խորհրդի նախագահը:
– Կարծում եմ, որ ամեն ինչ շատ ակնհայտ է, առկա են օրենքի բազմաթիվ խախտումներ, որոնք պետք է վերացնել, որովհետև այս ձևով ռեկտորի ընտրություն կազմակերպելն անիմաստ է:
– Ի՞նչ հանգուցալուծում եք պատկերացնում, հատկապես որ կառավարման ճգնաժամ էլ կա՝ ՀՊՏՀ-ն հիմնադրամ չդարձավ, խորհրդում խնդիրներ կան, ռեկտորի ժամանակավոր պաշտոնակատարը խախտումով է նշանակվել…
Կարդացեք նաև
– Նախ հանգուցալուծման մի մասն արդեն իրավապահների տիրույթում է, որովհետև ԿԳՄՍՆ-ի հանցագործության մասին հաղորդում է եղել, իսկ մնացածը կապված է հիմնադրամ դառնալու հետ, որ չգիտես ինչու, առանց մեզ տեղեկացնելու՝ կասեցրին: Հետո հայտնվեց Դիանա Գալոյանի նամակը ԿՄԳՍ նախարարությանը, որտեղ խնդրում էր կասեցնել հիմնադրամ դառնալու գործընթացը՝ առանց մեզ տեղեկացնելու:
– ԿԳՄՍ նախարարությունը չի հրապարակում Տնտեսագիտական համալսարանի ռեկտորի թափուր պաշտոնի մրցույթի համար դիմած թեկնածուների թիվը, այդտեղ միտում չե՞ք տեսնում:
– Չգիտեմ, թե ինչու չեն հրապարակում, դա բաց հանրային տեղեկատվություն է, և նրանք պարտավոր են տրամադրել: Եթե չեն տրամադրել, ուրեմն հերթական անգամ օրենք են խախտում:
– Ձեր կարծիքով, ընդհանրապես ինչի՞ կարիք ունի այսօրվա Հայաստանի պետական տնտեսագիտական համալսարանը, եւ հատկապես ինչը պետք է բացառել բուհում:
– Կարծում եմ, որ ՀՊՏՀ-ն կարիք ուներ և ունի հենց այն վճռական փոփոխությունների, որոնք մեկուկես տարի առաջ էին սկսվել, սակայն ինձ համար անհասկանալի պատճառով կասեցրեցին: Իսկ թե ինչ պետք է բացառել՝ նախևառաջ ապօրինությունները և կեղծիքը:
Զրուցեց Գոհար ՀԱԿՈԲՅԱՆԸ
Լուսանկարը՝ Համլետ Թադեւոսյանի ֆեյսբուքյան էջից:
